Një alarm i madh për sulme ajrore u lëshua në Ukrainë tri herë vetëm brenda ditës së enjte, për shkak të raportimeve për shpërthime në afërsi të kryeqytetit, Kiev.
Shkaktarët e shpërthimeve nuk u bënë të ditura menjëherë.
“E gjithë Ukraina është e kërcënuar nga sulmet raketore”, tha forca ajrore e Ukrainës, duke shtuar se avionët luftarakë rusë ishin ngritur në ajër.
Dy alarmet paraprake u lëshuan në orën 11:00 dhe në orën 14:00 me kohën lokale. Nuk u dhanë hollësi të tjera.
Alarmet për sulme ajrore u lëshuan në ditën kur presidenti rus, Vladimir Putin, tha se Moska do ta vazhdojë luftën në Ukrainë dhe se qëllimet e saj për këtë nuk kanë ndryshuar.
