Deputetja e Partisë Demokratike, Jorida Tabaku, iu përgjigj deklaratave të kryeministrit Edi Rama, duke e akuzuar atë se po tenton t’u shmanget përgjegjësive për gjendjen ekonomike duke u paraqitur si viktimë dhe duke sajuar kundërshtarë të brendshëm e të jashtëm.
Sipas Tabakut, nuk ekziston ndonjë “agresion i organizuar politik apo ekonomik” ndaj Shqipërisë. Ajo thekson se qytetarët janë kundër një qeverie dhe një sistemi që, siç shprehet ajo, mban në këmbë pakicën dhe rëndon mbi shumicën. Në reagimin e saj, deputetja demokrate kujtoi edhe pensionistët, duke thënë se 27% e tyre renditen si të varfër sipas standardeve kombëtare dhe ndërkombëtare. Ajo shtoi gjithashtu se turizmi, i cilësuar si një nga shtyllat kryesore të ekonomisë, vihet në rrezik nga korrupsioni, informaliteti dhe mungesa e një vizioni afatgjatë.
Të lidhura
None found
REAGIMI
Kryeministrit i ka mbetur vetëm vetëviktimizimi dhe shpikja e armiqve të brendshëm e të jashtëm, me qëllim ndërtimin e alibisë për dështimin e tij.
Nuk ka asnjë agresion të organizuar politik apo ekonomik kundër Shqipërisë. Ka qytetarë që janë ngritur kundër një qeverie dhe një sistemi që punon për pakicën dhe varfëron shumicën.
Dështimi ekonomik nuk mbulohet me propagandë. Ai shihet në tryezën gjithnjë e më të varfër të familjeve shqiptare. Ai është te pensionistët që jetojnë në kufijtë e varfërisë, ku 27% e tyre konsiderohen të varfër sipas çdo standardi kombëtar dhe ndërkombëtar.
Edhe turizmi, një nga shtyllat kryesore të ekonomisë, rrezikohet nga ky sistem i padrejtë, nga korrupsioni, informaliteti dhe mungesa e vizionit.
Ky sistem i pakicës ka krijuar moçalin që po fundos ekonominë dhe po largon shqiptarët nga vendi i tyre.
Çdo gjë tjetër është propagandë e vjetër dhe një përpjekje e dëshpëruar për të mbajtur në këmbë karakatinën e pushtetit. Koha është për ndryshim. Koha është të hapim një faqe të re për Shqipërinë.
