Prokuroria e Posaçme ka publikuar të dhëna të reja lidhur me hetimin ndaj ish-ministres së Infrastrukturës dhe Energjisë, Belinda Balluku.
Sipas SPAK, veprimet hetimore kanë evidentuar dyshime për korrupsion, fshehje pasurie dhe pastrim të produkteve të veprës penale. Në fokus është një vilë në kompleksin “Green Coast”, në Palasë, për të cilën prokuroria pretendon se pronarja faktike është Belinda Balluku.
Të lidhura
None found
Pasuria dyshohet se është mbajtur e fshehur përmes dokumenteve dhe veprimeve fiktive, duke u regjistruar në emër të shtetasit Igli Tare. Çështja lidhet edhe me tenderin për “Ndërtimin e Unazës së Jashtme Tiranë, Loti 7”, me fond limit 2 353 597 373.94 lekë pa TVSH.
SPAK dyshon se Balluku ka favorizuar bashkimin e operatorëve ekonomikë “Alko-Impex General Construcion” dhe “2T” sh.p.k., ndërsa në këmbim ka përfituar investime dhe punime në vilën e Palasës. Me kërkesë të Prokurorisë së Posaçme, GJKKO vendosi më 09.09.2026 sekuestrimin preventiv të pasurisë, e cila ka një sipërfaqe totale prej 478 m2.
Prokuroria e Posaçme ka vijuar hetimet në kuadër të procedimit penal nr.136 të vitit 2025, ndaj të pandehurës Belinda Balluku, për veprat penale të mëposhtme:
“Shkelja e barazisë së pjesëmarrësve në tendera apo ankande publike”, në bashkëpunim, e kryer tetë herë, parashikuar nga nenet 258/2 dhe 25 të Kodit Penal.
Kjo akuzë lidhet me procedurat e prokurimit për “Ndërtimi i tunelit të Llogarasë” në segmentin rrugor Orikum-Himarë, pjesë e autostradës SH8 (Vlorë-Sarandë).
Hetimi përfshin gjithashtu procedurën me objekt “Plotësimi rakordimi dhe vazhdimi i punimeve Sheshi Shqiponja – Lumi i Tiranës, Loti 1 dhe QMT”.
Një tjetër procedurë është ajo për “Ndërtimi i segmentit rrugor Sheshi Shqiponja-Bulevardi i Ri, Loti 2”.
Po ashtu, bëhet fjalë për “Ndërtim i segmentit rrugor Sheshi Shqiponja-Bulevardi i Ri- Shkozë, Urat mbi lumin Tirana”.
Në listën e procedurave përfshihet edhe “Ndërtimi i Unazës së Jashtme Tiranë, Loti 4”.
Hetimi lidhet edhe me “Ndërtim i Unazës së Jashtme Tiranë, Loti 5”.
Një tjetër objekt prokurimi është “Ndërtim i Unazës së Jashtme Tiranë, Loti 6”.
Procedura e fundit e përmendur është “Ndërtim i Unazës së Jashtme Tiranë, Loti 7”.
Balluku dyshohet gjithashtu për “Korrupsioni pasiv i personave që ushtrojnë funksione publike”, parashikuar nga neni 259 i Kodit Penal, si dhe për “Pastrimi i produkteve të veprës penale apo i veprimtarisë kriminale”, në bashkëpunim, sipas nenit 287, paragrafi 1, gërma “b”, dhe paragrafi 2 të Kodit Penal.
SPAK deklaron se, gjatë veprimeve të mëtejshme hetimore, përfshirë përdorimin e metodave speciale dhe mbledhjen e provave dixhitale e të provave të tjera, janë siguruar të dhëna për fakte të reja penale në ngarkim të Belinda Ballukut.
Sipas akteve të administruara, dyshimet për veprime të kundërligjshme lidhen me tenderin “Ndërtimi i Unazës së Jashtme Tiranë, Loti 7”, me fond limit 2 353 597 373.94 lekë pa TVSH, shumë e shprehur në njoftimin e SPAK si dy miliardë e treqind e pesëdhjetë e tre milionë e pesëqind e nëntëdhjetë e shtatë mijë e treqind e shtatëdhjetë e tre pikë nëntëdhjetë e katër lekë.
Prokuroria pretendon se Balluku, në cilësinë e Ministres së Infrastrukturës dhe Energjisë, së bashku me titullarin e autoritetit kontraktor Evis Berberi, anëtarët e njësisë së prokurimit Miranda Shkurti, Dhurata Lazaj dhe Nikollaq Mihali, si dhe anëtarët e komisionit të vlerësimit të ofertave Arbër Troka, Gëzim Noni dhe Arlinda Gordani, kanë krijuar avantazhe të padrejta për bashkimin fitues të operatorëve ekonomikë “Alko-Impex General Construcion” dhe “2T” sh.p.k.
Sipas SPAK, këto veprime janë kryer në kundërshtim me ligjin nr. 162/2020, “Për prokurimin publik”, nenet 18, 19, 21, 42/2, 56, 76, 77, 80, 92 dhe 95 të tij; me ligjin nr.9367, datë 07.04.2005, “Për parandalimin e konfliktit të interesave në ushtrimin e funksioneve publike”, i ndryshuar, nenin 3 të tij; si dhe me VKM nr. 285, datë 19.05.2021, “Për miratimin e rregullave të prokurimit publik”, nenet 7, pikat 1, 2 dhe 9, 26, 27, 47, pikat 2, 3 dhe 4, 73, 82 dhe 93.
Nga hetimi ka rezultuar se Belinda Balluku dyshohet se ka në pronësi faktike pasurinë e paluajtshme “Vila familjare 2F nr.188/1, Nukli 27”, në kompleksin “Green Coast”, Palasë, Himarë. Sipas prokurorisë, bëhet fjalë për një pasuri të padeklaruar dhe të fshehur.
Për të mos e regjistruar pasurinë në emrin e saj, Balluku dyshohet se ka përdorur shtetasin Igli Tare. Për këtë qëllim janë kryer veprime fiktive përmes kontratës së sipërmarrjes të datës 26.10.2020, në shumën 250,000 Euro, e cila përfshinte investimin deri në ndërtimin e pasurisë në fazën e karabinasë.
Më pas, punimet për përfundimin e objektit dyshohet se janë marrë përsipër dhe realizuar nga shtetasi Arbër Abazi, pronar i shoqërisë “Alko Impex General Construction”, e cila ishte pjesë e bashkimit të operatorëve të shpallur fitues për tenderin “Ndërtimi i Unazës së Jashtme Tiranë, Loti 7”. Sipas preventivit, vlera e investimit varionte nga 288,616 Euro deri në 410,526 Euro.
SPAK pretendon se Balluku, duke shfrytëzuar detyrën e Ministres së Infrastrukturës dhe Energjisë, ka kërkuar dhe marrë nga Arbër Abazi një përfitim të parregullt në formën e investimeve dhe punimeve në vilën “Vila familjare 2F nr.188/1, Nukli 27”, në kompleksin “Green Coast”, Palasë, Himarë, në këmbim të favorizimit të shoqërisë “Alko Impex General Construction” në procedurën e prokurimit.
Për të fshehur përfitimin që dyshohet se rridhte nga korrupsioni, Balluku pretendohet se ka përdorur sërish Igli Taren. Në këtë kuadër, sipas SPAK, janë kryer veprime të tjera fiktive për krijimin e dokumentacionit të pronësisë dhe regjistrimin e pasurisë në emër të tij, përmes kontratës fiktive të shitjes, datë 12.09.2025.
Prokuroria thekson se Balluku, në bazë të neneve 3, pika 2, gërma “a”, dhe 7, pika 1, të ligjit nr.9049, datë 10.04.2003, “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, kishte detyrimin ligjor për të deklaruar këtë pasuri. Sipas hetimit, ky detyrim nuk është përmbushur me qëllim fshehjen e pasurisë përmes dokumentacionit të krijuar në emër të Igli Tares.
Për faktet e reja penale që lidhen me vilën në kompleksin “Green Coast”, SPAK ka ngritur këto dyshime:
Belinda Balluku dyshohet për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të parashikuara nga nenet 260 dhe 257/a të Kodit Penal, si dhe për “Pastrimi i produkteve të veprës penale ose i veprimtarisë kriminale”, sipas nenit 287, gërma “b”, në rrethana cilësuese “në bashkëpunim dhe më shumë se një herë”, bazuar në nenin 287/2 të Kodit Penal.
Arbër Abazi dyshohet për veprën penale “Korrupsioni aktiv i funksionarëve të lartë shtetërorë ose të zgjedhurve vendorë”, të parashikuar nga neni 245 i Kodit Penal.
Igli Tare dyshohet për “Pastrimi i produkteve të veprës penale ose i veprimtarisë kriminale”, sipas nenit 287, gërma “b”, të Kodit Penal, e kryer në rrethana cilësuese “në bashkëpunim dhe më shumë se një herë”, në bazë të nenit 287/2 të Kodit Penal.
Edhe personi juridik “Alko Impex General Construction”, shoqëri e shtetasit Arbër Abazi, dyshohet se ka kryer veprën penale “Korrupsioni aktiv i funksionarëve të lartë shtetërorë ose të zgjedhurve vendorë”, parashikuar nga neni 245 i Kodit Penal.
Pas kërkesës së Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.591, datë 09.09.2026, vendosi caktimin e masës së sigurimit pasuror “sekuestro preventive” mbi pasurinë “Vila familjare 2F nr.188/1, Nukli 27”, në kompleksin “Green Coast”, Palasë.
Pasuria është e regjistruar në Zonën Kadastrale 1739, me numër pasurie 68/87/73, Volumi 9, Faqe 148. Ajo ka sipërfaqe totale 478 m2, prej të cilave 478 m2 truall dhe 142.6 m2 ndërtesë, me përshkrimin: sipërfaqe kati përdhe 142.6m2, sipërfaqe kati i parë 128.6m2, sipërfaqe nën parkim1 20.1m2 dhe sipërfaqe nën parkim2 40.2m2.
Prokuroria e Posaçme bën me dije se hetimet vijojnë dhe se do të kryhen veprimet e nevojshme për të sqaruar plotësisht rrethanat dhe faktet penale që janë objekt i procedimit.
Çdo person prezumohet i pafajshëm derisa fajësia e tij të provohet me një vendim gjyqësor të formës së prerë.
