Pas më shumë se katër muajsh qëndrese, qytetarët dalin sot në Tiranë për protestën e 133-të kundër qeverisë. Dorëheqja e kryeministrit Edi Rama mbetet kërkesa e tyre e pandryshuar, ndërsa organizatorët thonë se qëndresa do të vazhdojë derisa kërkesat të përmbushen.
Tubimi zhvillohet në vijim të ngjarjeve të fundit politike, mes të cilave është edhe miratimi në Kuvend i reformës territoriale.
Të lidhura
None found
Kjo reformë parashikon që numri i bashkive të reduktohet nga 61 në 46. Opozita dhe qytetarë e kanë kundërshtuar atë, duke ngritur shqetësime për ndikimin e mundshëm te përfaqësimi dhe shërbimet në njësitë e vogla vendore.
Krahas dorëheqjes së Ramës, platforma e protestuesve parashikon ngritjen e një qeverie teknike tranzitore me mandat 12-mujor dhe ndryshimin e sistemit politik e zgjedhor.
Pjesë e kërkesave është edhe kundërshtimi i disa nismave ligjore, të cilat, sipas tyre, cenojnë interesat e qytetarëve.
Aksioni do të vijojë edhe gjatë ditëve të ardhshme, kanë paralajmëruar protestuesit. Si një moment tjetër i rëndësishëm pritet 13 tetori, datë për të cilën është drejtuar thirrja që studentët dhe të rinjtë të marrin pjesë në protestë.
