Agron Shehaj, kreu i Partisë Mundësia, u rikthye në foltoren e Kuvendit pas një muaji mungesë, si pasojë e vendimit të Byrosë ndaj tij. Ai deklaroi se e kishte parashikuar pengimin e hyrjes së tij në sallë gjatë seancës së mëparshme.
Duke iu referuar mbledhjes së zgjeruar të grupit parlamentar të PS-së, Shehaj e cilësoi atë si të turpshme dhe tha se të pranishmit qëndronin të gjithë kokëulur.
Të lidhura
None found
“Fillimisht duhet t’ju falënderoj që më mundësuat të jem në këtë sallë. Ajo që ndodhi herën e kaluar ishte një skandal i mirëfilltë, pasi një deputeti të opozitës iu ndalua arbitrarisht hyrja në sallë. E dija se nuk do të mund të futesha në Kuvendin e korrupsionit dhe të atyre që prej 35 vitesh ua kanë nxirë jetën qytetarëve. E dija se nuk do t’ia dilja të hyja, por duhej që të gjithë të shihnin mënyrën si veproni dhe çfarë bëni me Rregulloren. Kuvendin e trajtoni si pronën tuaj”, u shpreh ai.
Sipas Shehajt, prania e Ramës në Kuvend ishte arsyeja pse atij nuk iu lejua hyrja në sallë. Ai tha se kryeministri nuk mund të shfaqej si herën e fundit, i lodhur, ndërkohë që qytetarët kanë protestuar për 2 muaj duke kërkuar dorëheqjen e tij, dhe shtoi se Rama “u plak brenda ditës”.
Shehaj deklaroi gjithashtu se Belinda, të cilën e quajti të korruptuar, u mbrojt nga votat e mazhorancës.
Sipas tij, Rama shmang përballjen me opozitën, mbledh partinë dhe u drejtohet praktikisht vetëm anëtarëve të saj.
“Ky është skandali. Ju mblodhi në një mënyrë patetike dhe ishit të gjithë me kokën poshtë. Me pafytyrësi u tall me një zonjë të pamundur, ndërsa Taulanti zgërdhihej. Atë e bezdisin të varfrit dhe njerëzit e pamundur; me paturpësi imiton zonjën. Përse ajo të mos protestojë? Taulanti shqetësohet”, tha Shehaj.
