Këtë të premte, Prokuroria e Posaçme Antikorrupsion (SPAK), në bashkëpunim me Policinë e Shtetit, ka zhvilluar një megaoperacion për ekzekutimin e masave të sigurisë ndaj disa personave të dyshuar për përfshirje në veprimtari kriminale.
Emri i Ilir Shtufit, është përmendur edhe më herët në të ashtuquajturën dosja “Balluku”, ku ai dyshohej se favorizohej në procedura tenderuese nga ish-zëvendëskryeministrja Belinda Balluku.
Biznesmeni Shtufi, ka përfituar një sërë lejesh ndërtimi në Tiranë dhe aktualisht është i angazhuar në investimin e kullës “Mali i Tiranës”, një prej projekteve më të mëdha të zhvillimit në kryeqytet.
Ilir Shtufi, ka 91% të aksioneve së kompanisë ndërtuese Nova Construction 2012, që fitoi tenderin e Lotit 4 të Unazës së Madhe në Tiranë, edhe kjo procedurë sot në hetim nga SPAK.
Ilir Shtufi njihet gjithashtu, si një nga personat me lidhje të afërta me Shkëlzen Berishën, djalin e ish-kryeministrit Sali Berisha.
Operacioni është ende në vijim e sipër, ndaj po ushtrohen kontrolle në disa zona në Tiranë dhe Vlorë.
Sa i përket strukturës së grupit kriminal, dyshohet se krerët janë të vendosur në Dubai. Sakaq, të ardhurat nga trafiku investoheshin në ndërtim.
