Pas situatës së rënduar, që është krijuar në veri të Kosovës ka reaguar dhe ish-kryeministri i Kosovës, Isa Mustafa.
Mustafa ka lënë të nënkuptohet se situata është serioze dhe liderët e Kosovës duhet të mbledhin urgjentisht Këshillin e Sigurisë Kombëtare.
“Situata në veri të Kosovës është tepër serioze dhe e rrezikshme. Në një situatë të tillë , Presidentja, kryeministri dhe kryeparlamentari duhet të jenë në Kosovë”,- është shprehur në reagimin e tij të shpërndarë në faqen e tij zyrtare në ‘Facebook’, ish-kryeministri Mustafa.
Më tej në reagimin e tij Mustafa i bën thirrje Presidentes Osmani dhe Kryeministri Albin Kurti duke u thënë se, “nuk mund të dërgojnë mesazhe, njëra nga Neë Yorku, tjetri nga Shkupi e nga Budapesti, kurse Njësitë Speciale të Policisë të Kosovës të mbesin të mbërthyera në Jarinjë e Bërnjak nën kërcënimin e helikopterëve, avionëve e tankeve të Serbisë. Kjo sjellje është joserioze dhe e pafalshme.”
“Në momente të tilla do duhej të thirret Këshilli i Sigurisë nga Presidentja e vendit dhe të ndërmerren masat e nevojshme duke u koordinuar me partnerët tanë, SHBA, BE, KFOR-in dhe institucionet relevante në Kosovë.”, u shpreh në përfundim të reagimit të tij, ish-kryeministri Mustafa./ albeu.com
