Një sasi e konsiderueshme droge, që dyshohet se po dërgohej drejt Durrësit, është sekuestruar gjatë operacionit policor të koduar “Drejtimi”, ndërsa dy persona kanë përfunduar në pranga.
Sipas raportimeve paraprake, të arrestuarit janë Mirland Herri, 51 vjeç, dhe Lutfi Hoxha, 41 vjeç.
Të lidhura
None found
Gjatë aksionit, policia pikasi një automjet tip “Benz”, për të cilin kishte dyshime se po përdorej për transportimin e lëndës narkotike. Nga kontrolli i makinës u gjet një çantë që përmbante 7 pako, konkretisht 4 me heroinë dhe 3 me kokainë.
Të dhënat e para të policisë treguan se sasia e përgjithshme e sekuestruar ishte 5 kilogramë e 244 gramë heroinë dhe kokainë.
Drejtori i DVP Tiranë, në deklaratën për operacionin, falënderoi përfaqësuesit e medias për praninë në një ditë pushimi dhe për bashkëpunimin korrekt në funksion të informimit të qytetarëve mbi rezultatet e strukturave vendore të Policisë Tiranë.
Ai theksoi se strukturat vendore të Policisë Tiranë vijojnë të jenë maksimalisht të angazhuara në parandalimin e ngjarjeve kriminale, zbulimin dhe goditjen e veprimtarive të paligjshme, kapjen e personave në kërkim dhe të individëve që lëvizin me armë zjarri apo përpiqen t’i trafikojnë ato. Sipas tij, puna është përqendruar gjithashtu te lufta kundër trafikimit të narkotikëve dhe te ndjekja e vazhdueshme e konflikteve e denoncimeve të qytetarëve.
Në këtë kuadër, mesditën e sotme, Seksioni për Hetimin e Narkotikëve në Drejtorinë Vendore të Policisë Tiranë, pas punës operative, organizoi dhe përmbylli operacionin “Drejtimi”. Përmes këtij aksioni u godit dhe u parandalua një tentativë për trafikimin e një sasie të konsiderueshme drogash të forta.
Policia njoftoi se gjatë operacionit u kapën dhe u arrestuan në flagrancë Mirand Herri, 51 vjeç, banues në Maminas të Durrësit, si dhe Luftim Hoxha, 41 vjeç, i lindur në Dibër dhe me banim në Maminas, Durrës.
Informacionet e siguruara në rrugë operative nga Seksioni për Hetimin e Narkotikëve tregonin se dy shtetas do të çonin një sasi të madhe lënde narkotike në zonën e “Treshit”, pranë Nishtulla 3, duke lëvizur në drejtim të Durrësit.
Mbi bazën e këtyre të dhënave, operacioni policor “Drejtimi” u organizua brenda një kohe shumë të shkurtër dhe u finalizua me ndërhyrjen e shërbimeve.
Në rrugën “Kastriotët”, efektivët konstatuan një automjet tip “Mercedes-Benz”, brenda të cilit ndodheshin dy personat e dyshuar dhe po transportohej droga. Shërbimet e Seksionit për Hetimin e Narkotikëve ndërhynë duke ndaluar makinën.
Gjatë verifikimit të pjesës së brendshme të automjetit, policia gjeti një çantë ku ishin vendosur 7 pako me lëndë të dyshuar narkotike.
Nga këto, 4 pako përmbanin heroinë me peshë 2 kilogramë e 123.6 gramë, ndërsa 3 pakot e tjera kishin lëndë të dyshuar kokainë, me peshë të përgjithshme 3 kilogramë e 120.6 gramë.
Në total u sekuestruan 5 kilogramë e 244.2 gramë heroinë dhe kokainë.
Dy të ndaluarit u shoqëruan menjëherë në Drejtorinë Vendore të Policisë Tiranë për kryerjen e procedurave të mëtejshme. Nga veprimet rezultoi se ata synonin ta transportonin lëndën narkotike drejt Durrësit.
Hetimet po vijojnë në koordinim me Prokurorinë, me qëllim identifikimin e personave të tjerë të përfshirë në këtë veprimtari kriminale. Për shkak të hetimit në vazhdim, policia bëri të ditur se nuk mund të publikojë hollësi të tjera mbi operacionin.
Aksioni “Drejtimi” është pjesë e operacioneve të njëpasnjëshme të strukturave vendore të Policisë Tiranë kundër shitjes dhe trafikimit të narkotikëve. Vetëm një javë më parë u kapën dy persona me 250 gramë kokainë, ndërsa gjatë dy javëve të fundit janë përfunduar disa operacione për ndalimin e personave në kërkim me rrezikshmëri dhe të individëve që lëviznin të armatosur, mes të cilëve kishte edhe shtetas të huaj.
Drejtori i DVP Tiranë u ndal gjithashtu te një rast i konsideruar shumë i ndjeshëm, që lidhej me një përplasje me armë të ftohta mes rreth 28 të miturve, të moshave nga 13 deri në 17 vjeç.
Falë sigurimit në kohë të informacionit dhe angazhimit maksimal të Komisariatit të Policisë Nr. 6, Forcave Operacionale dhe “Shqiponjave” të Drejtorisë Vendore të Policisë Tiranë, u kryen verifikime për rreth 72 orë. Përmes strukturave të Hetimit të Krimit Kibernetik në DVP Tiranë u kontrolluan rrjetet sociale, ndërsa u shfrytëzuan edhe të dhënat e marra nga shërbimet në terren. Si rezultat, të miturit u identifikuan dhe u parandalua një ngjarje që mund të kishte pasoja fatale për jetën e tyre.
Drejtori falënderoi të gjitha shërbimet policore për profesionalizmin e treguar në parandalimin e konfliktit.
Ai u bëri njëkohësisht thirrje prindërve që të bashkëpunojnë me inspektorët e Policisë në zonat ku banojnë dhe me Patrullat e Përgjithshme në terren, duke raportuar çdo situatë të dyshimtë që vërejnë te fëmijët. Sipas tij, ky bashkëpunim mundëson ndërhyrjen në kohë dhe shmangien e ngjarjeve që rrezikojnë jetën.
Në mesazhin drejtuar qytetarëve, u theksua se Drejtoria Vendore e Policisë Tiranë mbetet maksimalisht e angazhuar dhe disponon të gjitha kapacitetet e nevojshme për garantimin e rendit e të sigurisë dhe për luftimin e çdo paligjshmërie.
Megjithatë, drejtori nënvizoi se pa ndihmën e qytetarëve ky mision i shenjtë do të mbetej i cunguar, ndaj kërkoi që çdo rast paligjshmërie të denoncohet në kohë pranë strukturave policore ose në numrin 112.
Në përfundim, ai kërkoi më shumë mbështetje dhe besim ndaj Policisë, në mënyrë që së bashku të garantohet një mjedis edhe më i sigurt, duke i falënderuar qytetarët.
