Mëngjesi është një vakt shumë i rëndësishëm, ai mund të rregullojë ose t’ju prishë ditën.
Opsionet e njohura të mëngjesit, si buka me gjalpë dhe reçel apo brioshët, nuk janë më të mirat, pasi ato ofrojnë karbohidrate dhe yndyrna të cilësisë së dobët.
Mëngjesi ideal duhet të kombinojë një dozë të mirë proteinash dhe fibrash për të qenë sa ushqyes, ashtu edhe mbushës. Cilat ushqime i ofrojnë këto lëndë ushqyese të vlefshme?
Tërshëra: Janë të pasura me beta glukan, një lloj fibrash që nxit ndjenjën e ngopjes dhe në të njëjtën kohë ul nivelin e kolesterolit. Tërshëra gjithashtu ofron një mori antioksidantësh dhe acide yndyrore të shëndetshme omega-3, acid folik dhe kalium.
Veza: Pavarësisht përmasave të vogla, ajo grumbullon një sërë lëndësh ushqyese. Është një nga burimet më të mira të proteinave cilësore dhe në të njëjtën kohë jep vitaminë D, vitamina B, selen, jod dhe kolinë.
Arrat: Arrat janë një zgjedhje ideale për të plotësuar nevojat e trupit për proteina, veçanërisht për ata që shmangin mishin. Arrat janë të pasura me antioksidantë, magnez, kalium dhe yndyrna të shëndetshme.
Manaferrat: Të gjitha llojet e manaferrave (luleshtrydhet, boronicat, manaferrat, etj.) kanë kalori minimale duke siguruar një sasi të konsiderueshme fibrash dhe antioksidantësh.
Fara e lirit: Fara e vockël është një superushqim, pasi grumbullon një sasi të konsiderueshme të acideve yndyrore omega-3, proteinave dhe fibrave. Konsumimi i rregullt i farave të lirit lidhet me nivele më të ulëta të kolesterolit, përmirësim të ndjeshmërisë ndaj insulinës, nivele më të ulëta të sheqerit në gjak dhe rrezik më të ulët të kancerit të gjirit
Kosi: Kosi, si shumica e produkteve të qumështit, është një burim i mirë proteinash. Zgjidheni të kulluar, pasi ka një përmbajtje më të lartë proteinash se llojet e tjera.
Banania: Përveç kaliumit, banania jep niseshte rezistente, e cila nuk shpërbëhet nga trupi dhe mbështet funksionimin e duhur të aparatit tretës./albeu.com
