Një aksident ka ndodhur mesditën e së martës, 26 dhjetor, në rrugën provinciale Veria-Sfikia, rreth tre kilometra larg fshatit Pieri.
Automjeti në të cilin udhëtonin dy gra, i cili shkonte në drejtim të Sfikisë, ka rënë nga një shkëmb rreth 80 metra i lartë. Për pasojë pasagjerja 73-vjeçare ka humbur jetën dhe drejtuesja e mjetit ka mbetur e plagosur.
Sipas informacioneve të verianet, shoferja ishte nusja e viktimës dhe ato po ktheheshin nga spitali i Verias ku e moshuara i ishte nënshtruar hemodializës.
Njësia e Zjarrfikëses ka nxjerrë dy të aksidentuarat nga makina dhe i ka dërguar në spital, por për të moshuarën mjekët nuk mund të bënin më asgjë.
Në të njëjtën kohë, sipas mediave vendase, është ndaluar edhe drejtuesi i makinës, me origjinë shqiptare, mjeti i të cilit dyshohet se i ka bllokuar rrugën makinës me të cilën udhëtonindy gratë.
Gruaja që po kthehej në Sfikia, me vjehrrën për të shmangur një përplasje kokë më kokë, ka devijuar rrugën e saj dhe ka përfunduar në humnerë.
Autoritetet po kryejnë hetimet për ngjarjen, ndërsa eksperti në vendngjarje pritet të zbardhë shkaqet e sakta të tragjedisë.
