Sentineli i Veriut është një ishull i vogël rreth 59,67 km² në sipërfaqe dhe rreth 8 km i gjerë. I përket Ishujve Andaman, të sunduar nga India, por aty ka ende fise për të cilët koha duket se ka ndalur.
Në Gjirin e Bengalit, Sentineli i Veriut është shtëpia e fisit më të izoluar në planet, të cilët njihen si jashtëzakonisht të dhunshëm dhe për faktin se ata jetojnë ende në Epokën e Gurit. Besohet se ky ishull është i banuar që përpara 60 000 vitesh.
Askush nuk këshillon që të shkohet atje. Thuhet se edhe aventurieri Marco Polo, i cili jetoi midis shekujve 13 dhe 14, i famshëm për historitë e udhëtimeve të tij, i referohej këtij ishulli kështu: “Nëse një i huaj vjen në vendin e tyre, ata menjëherë e vrasin dhe e hanë”.
Banorët e këtij ishulli rrallëherë e kanë lejuar veten të fotografohen nga afër dhe pothuajse nuk janë parë ndonjëherë në ndonjë video. Në fakt, shumica e imazheve atje janë me cilësi shumë të dobët dhe gjithmonë nga larg. Qeveria indiane ndali kontaktet me ta dekada më parë dhe aktualisht ekziston një zonë përjashtimi prej tre miljesh rreth Sentinelit.
Pas cunamit të vitit 2004 në Azinë Juglindore, banorët e Sentinelit të Veriut zmbrapsën me gurë dhe shigjeta helikopterët që mbërritën në ishull për të parë dëmet e cunamit. Besohet se në vitin 2018, një turist amerikan i mbërritur në ishull vdiq nga helmi i shigjetave që iu hodhën.
Në vitin 2001, regjistrimi indian numëronte 21 burra dhe 18 gra në Sentinelin e Veriut. Një dekadë më vonë, autoritetet panë vetëm 12 burra dhe 3 gra, megjithëse numri aktual besohet të jetë më i lartë, pasi është praktikisht e pamundur të afrohesh pa u sulmuar.
Sipas një studimi të kryer nga shkencëtarët në Qendrën e Hyderabad për Biologjinë Qelizore dhe Molekulare në Indinë jugore dhe të publikuar në revistën BMC Genomics, banorët e ishullit janë pasardhësit e drejtpërdrejtë të valës së parë që u largua nga Afrika dhe mbërriti atje 60 000 vjet më parë. Për shkak të izolimit, gjenomi i tyre është një nga më të vjetrit në botë./Albeu.com/
