Në qarkun e Dibrës vijonë reshjet e dëborës. Trashësia në qytet varion deri në 20 cm, ndërsa në zonat e thella kalon 40 cm. Gjatë orëve të pasdites është bërë e mundur hapja e baypasit të Murrizit, 4 mjete borëpastruese kanë bërë pastrimin dhe kriposjen e rrugës, në momentet që flasim kalimi bëhet me zinxhirë.
Aksi Peshkopi – Kala e Dodës – Kukës kalimi bëhet me zinxhirë, më i vështirë është segmenti nga Cereni deri në Vasie pasi fryn erë dhe mbush trupin e rrugës me borë duke vështirësuar punën e borëpastrueseve.
Aksi Peshkopi – Qafë Draj – Kukës kalimi bëhet me zinxhirë pasi bora ka zënë rrugën e ngrirë në disa segmente dhe ka rrezik për rrëshqitje.
Aksi Ura e Çerenecit – Librazhd kalimi bëhet me zinxhirë pasi nga Ostreni drejt Klenjës ka trashësi bore mbi 40 cm.
Një pjesë e rrugëve Rurale janë të hapura, por vijojnë të jenë të bllokuara rrugët lidhëse të fshatrave mes tyre dhe me qendrat e njësive administrative.
Problematike është situata në Njësitë Administrative Lurë, Selishtë, Sllovë, Kala e Dodës në Dibër, ndërsa në Bulqizë Njësitë Krastë, Ostren, Trebisht dhe disa fshatra të Zerqanit.
Si pasojë e reshjeve të borës dhe erës së fortë janë dëmtuar shtylla dhe përcjellësa elektrik. Janë pa energji elektrike 8 fshatra në Lurë, fdhatrat e Kalasë së Dodës, dhe një pjesë e Sllovës. Energjia mungon edhe në Njësinë Ostren dhe Krastë në Bulqizë.
