Policia e Shkodrës ka finalizuar operacionin “Mashtrimi”, ku kanë nisur hetimet për shtetasen R. S., 41 vjeçe, me detyrë administratore sociale në bashkinë Vau i Dejës, dhe 51 persona të tjerë, që kishin përfituar ndihmë ekonomike, jashtë kushteve që parashikon ligji.
Këta persona prej disa vitesh trajtoheshin me ndihmë ekonomike, në një kohë kur një pjesë e mirë e tyre kanë qenë emigrantë jashtë vendit. Nuk dihet ende dëmi që i është shkaktuar buxhetit të bashkisë nga dhënia e jashtëligjshme e këtyre ndihmave.
Të lidhura
None found
Njoftimi i Policisë:
Finalizohet operacioni policor i koduar “Mashtrimi”. Operacioni i zhvilluar nga Seksioni për Hetimin e Krimit Ekonomiko-Financiar në DVP Shkodër.
Procedohet penalisht administratorja sociale e bashkisë Vau i Dejës, për veprën penale “Shpërdorimi i detyrës”. Procedohen penalisht 51 shtetas që kanë përfituar ndihmën ekonomike nga kjo bashki, me anë të mashtrimit.
Specialistët e Seksionit për Hetimin e Krimit Ekonomik Financiar në DVP Shkodër, në bashkëpunim me Prokurorinë e Rrethit Gjyqësor Shkodër, në vijim të punës për goditjen e veprimtarisë kriminale në fushën e krimit ekonomik dhe financiar, bazuar në informacionet e marra në rrugë operative, kanë organizuar dhe finalizuar operacionin policor të koduar “Mashtrimi”.
Si rezultat i këtij operacioni u proceduan 51 shtetas, të gjithë banues në Vig-Mnelë, Vau i Dejës, për veprën penale “Mashtrimi”. Nga veprimet hetimore ka rezultuar se këta shtetas kanë përfituar me anë të mashtrimit, që nga viti 2017, ndihmën ekonomike që ofron bashkia Vau i Dejës.
Në vijim të veprimeve u procedua penalisht edhe shtetasja R. S., 41 vjeçe, me detyrë administratore sociale në bashkinë Vau i Dejës, për veprën penale “Shpërdorimi i detyrës”, sepse në kundërshtim me ligjin, ka bërë pjesë të skemës së ndihmës ekonomike, shtetasit e lartpërmendur, të cilët kanë qenë jashtë vendit ose nuk plotësonin kriteret për të përfituar ndihmën ekonomike.
Materialet iu referuan Prokurorisë së Rrethit Gjyqësor, për veprime të mëtejshme.
