Kylian Mbappe, ylli i sulmit të Francës, reagoi pas suksesit bindës 3-0 ndaj Suedia në fazën e 1/16-ave të Kupës së Botës 2026.
Të lidhura
None found
Me dy golat e shënuar në këtë ndeshje, Mbappe e ka çuar në gjashtë totalin personal në këtë Botëror, duke u barazuar me Lionel Messi. Në të njëjtën kohë, francezi ka arritur në 17 gola gjithsej në historinë e pjesëmarrjeve të tij në Kupat e Botës, vetëm dy më pak se rekordi i Messit prej 19 golash.
I pyetur për aksionin me gërshërë të shokut të skuadrës, Michael Olise, Mbappe u shpreh:
“Mendova se do ta kontrollonte me gjoks sepse nuk e shikoi portën, por pati fat të keq që përfundoi duke goditur shtyllën”, tha Mbappe.
Ai sqaroi gjithashtu edhe arsyen pse e gjithë skuadra shkoi drejt trajnerit Didier Deschamps pas golit të tij.
“Nuk isha vetëm unë, ishte e gjithë skuadra. Ka gjëra më të rëndësishme se futbolli apo Kupa e Botës. Të qenit i bashkuar është në ADN-në e këtij grupi. Trajneri nuk është vetëm, pavarësisht se çfarë ndodh më pas”.
Kur u pyet nëse synon të thyejë rekordin e golave në Kupën e Botës, sulmuesi francez theksoi se në plan të parë ka ecurinë e ekipit.
“Jo, jo, jo. Qëllimi është të shkojmë sa më larg të jetë e mundur me ekipin dhe të kthehemi këtu më 19 korrik. Natyrisht, sa më shumë gola të shënoj, aq më lart do të ngjitem në renditje”.
Në përfundim, Mbappe nënvizoi se nuk po mendon për një garë individuale me Messin.
“Jam i sigurt se Leo do të shënojë më shumë gola, por nuk po e shoh këtë. Jam më i përqendruar te kundërshtarët tanë dhe pjesa tjetër e turneut. Dua të bëj histori për vendin tim dhe t’i bëj njerëzit krenarë”, tha Mbappe.
