Pas afro një muaji në arrati, policia vuri në pranga mbrëmjen e së martës zëvendësdrejtorin e Kadastrës së Dibrës, Danjel Gjura. Ai akuzohet nga organet e drejtësisë për “Mashtrim” dhe “Falsifikim të dokumenteve”, ndërsa në të kaluarën ka mbajtur edhe detyrën e drejtorit të Kadastrës Dibër.
Gjura nuk është i vetmi përfaqësues i Kadastrës Dibër që ka përfunduar në pranga.
Të lidhura
None found
Më 17 qershor të këtij viti, Policia e Dibrës njoftoi se, pas një hetimi 7-mujor, ishte zbërthyer një skemë kriminale për falsifikimin e dokumenteve të pronësisë, ku përfshiheshin 8 zyrtarë të tjerë të Kadastrës dhe një notere.
Sipas hetimeve, falsifikimi i dokumenteve ishte kryer me synimin për t’i siguruar një pronë shtetasit Teshar Doçi, i cili u arrestua bashkë me një familjar të tij. Në të njëjtën kohë, Gjykata Dibër vendosi masën e sigurisë “Detyrim paraqitje” edhe për bashkëshorten e Teshar Doçit.
Përveçse ka mbajtur poste drejtuese në ASHK Dibër, Danjel Gjura ka qenë edhe kandidat për deputet në zgjedhjet e 2025 me siglën e Partisë Socialiste.
