Lëvizja për Zhvillim Kombëtar ka bërë publike platformën e saj politike për kapërcimin e krizës në Shqipëri, ku kërkon largimin nga detyra të kryeministrit Edi Rama dhe ngritjen e një qeverie të re me bazë të gjerë, të orientuar drejt Europës. Sipas LZHK-së, vendi ndodhet përballë një krize të shumëfishtë politike, institucionale, sociale, demografike dhe ekonomike.
Në qëndrimin e saj, lëvizja nënvizon se shteti u përket të gjithë qytetarëve dhe nuk mund të konsiderohet pronë e qeveritarëve, ndërsa drejtimi i tij duhet parë si një mandat i përkohshëm dhe si përgjegjësi publike.
Të lidhura
None found
Paketa e propozuar përfshin anulimin e katër ligjeve: atij për investimet strategjike, ligjit për zonat e mbrojtura, ligjit për paketën e maleve dhe ligjit për koncesionet e partneritetin publik privat. Në të njëjtën kohë, LZHK kërkon shfuqizimin e ligjit për reformën territoriale dhe miratimin, përmes konsensusit politik, të reformës territoriale dhe asaj zgjedhore.
Platforma kërkon gjithashtu heqjen e ndryshimeve kushtetuese të miratuara më 21 prill 2008. Sipas Lëvizjes për Zhvillim Kombëtar, ky hap do të ndihmonte në rikthimin e funksionimit normal të shtetit dhe demokracisë. Në dokument parashikohet edhe mbështetje politike për SPAK-un.
LZHK ka deklaruar se do të marrë pjesë në protestën e nesërme dhe u ka bërë thirrje qytetarëve të bashkohen masivisht, në mënyrë paqësore.
Deklarata për mediat
Lëvizja për Zhvillim Kombëtar e cilëson situatën në Shqipëri si një krizë të thellë politike e institucionale, sociale e qytetare, si edhe demografike e ekonomike.
Sipas saj, qëllimi i angazhimit të kësaj force ka qenë ndërtimi i një demokracie funksionale dhe forcimi i institucioneve shtetërore. Që prej themelimit, LZHK ka përcaktuar si moto politike shprehjen “Ne bëjmë shtet”.
Platforma mbështetet në bindjen se shteti është institucion i përbashkët i qytetarëve dhe jo pronë e atyre që qeverisin, ndërsa qeverisja përfaqëson një përgjegjësi të përkohshme.
Përballë situatës së rëndë në vend, Lëvizja për Zhvillim Kombëtar propozon këto masa: dorëheqjen e kryeministrit Rama; krijimin e një qeverie të re me bazë të gjerë për Europën; shfuqizimin e Ligjit Nr. 55/2015 “Për Investimet Strategjike”; shfuqizimin e Ligjit Nr. 81/2017 “Për Zonat e Mbrojtura”; shfuqizimin e Ligjit Nr. 20/2025 “Për Paketën e Maleve”; si dhe shfuqizimin e Ligjit Nr. 88/2025 “Për koncesionet dhe partneritetin publik privat”.
Në vijim, dokumenti parashikon anulimin e ligjit “Për Reformën Territoriale”, miratimin me konsensus politik të Reformës Territoriale dhe Reformës Zgjedhore, shfuqizimin e ndryshimeve kushtetuese të 21 prillit 2008 për rikthimin e funksionimit normal të shtetit dhe demokracisë, si dhe mbështetje politike për SPAK-un.
Lëvizja deklaron se platforma është e hapur për diskutim me të gjithë aktorët dhe faktorët realë politikë dhe se është e gatshme të japë kontributin e saj për kapërcimin e gjendjes së vështirë që po kalon Shqipëria.
LZHK thotë se ka mbështetur protestat qytetare dhe rinore që prej ditës së parë, më 31.05.2026, ndërsa njofton se do të jetë e pranishme edhe në protestën e nesërme. Në fund, ajo u kërkon qytetarëve të dalin masivisht në shesh dhe të protestojnë në mënyrë paqësore.
