Ministri i Punëve të Brendshme, Besfort Lamallari, u ka kërkuar qytetarëve të tregojnë kujdes maksimal dhe ndjenjë përgjegjësie për të shmangur zjarret, duke vënë theksin te fakti se çdo vatër e shkaktuar nga njeriu rrezikon jetën e njerëzve, pronën, pyjet dhe pasuritë natyrore, si edhe përbën vepër penale me ndëshkime të rënda. Në një mesazh në rrjetet sociale, Lamallari theksoi se mbrojtja e vendit nga flakët është detyrë e përbashkët.
“Kujdes! Zjarrvënia nuk është pakujdesi, por krim që ndëshkohet me burgim. Çdo zjarr i shkaktuar nga dora e njeriut është një kërcënim për jetën, pronën, pyjet dhe të mirën e përbashkët. Kërkohet më shumë përgjegjësi qytetare dhe gatishmëri për të mbrojtur çdo qytetar dhe shmangur katastrofa,” shprehet ministri Lamallari.
Të lidhura
None found
Ai kujtoi gjithashtu se ndryshimet e fundit në Kodin Penal kanë sjellë ashpërsim të dukshëm të masave ndëshkuese për zjarrvënien, në varësi të rrethanave dhe pasojave që ajo shkakton.
Kur zjarrvënia është e qëllimshme, dënimi shkon nga 5 deri në 8 vjet burg nëse kryhet gjatë stinës së nxehtë, në kushte që favorizojnë përhapjen e flakëve ose pranë zonave të banuara; nga 4 deri në 10 vjet burg nëse prek zona të mbrojtura, objekte të trashëgimisë kulturore, objekte kulti, monumente kulture ose infrastrukturë kritike; ndërsa nga 7 deri në 15 vjet burg kur kryhet me synim ndryshimin e kategorisë ose destinacionit të tokës.
Në mesazhin e tij, Lamallari vuri në dukje se pas çdo zjarri fshihet një barrë e rëndë njerëzore dhe materiale. “Një pakujdesi ose një veprim i qëllimshëm mobilizon qindra njerëz, dhjetëra mjete dhe helikopterë për të mbrojtur jetën, banesat dhe natyrën. Çdo zjarr lë pas humbje për natyrën, komunitetin dhe brezat që vijnë. Mbrojtja e Shqipërisë nga zjarret fillon me përgjegjësinë e secilit prej nesh,” theksoi ministri i Punëve të Brendshme. Apeli i tij ishte për bashkëpunim të qytetarëve në respektimin e rregullave të parandalimit të zjarreve, ndërsa çdo rast zjarrvënieje do të trajtohet me tolerancë zero.
