Presidenti i Ekuadorit Guillermo Lasso shpalli gjendjen e jashtëzakonshme për 60 ditë duke filluar nga e premtja në provincat bregdetare të Guayas, Esmeraldas dhe Manabi, të cilat janë rrënuar nga delikuenca dhe kriminaliteti në lidhje me trafikun e drogës.
Lasso e njoftoi masën të premten në një mesazh të transmetuar drejtpërdrejt nga Sekretariati i Përgjithshëm i Komunikimit të Presidencës përmes kanaleve zyrtare të internetit.
“Me dekret ekzekutiv kam shpallur gjendjen e jashtëzakonshme në provincat Guayas, Manabi dhe Esmeraldas, në fuqi që nga mesnata e sotme”, tha presidenti.
Një shtetrrethim do të jetë në fuqi nga ora 23:00 deri në 5:00 të mëngjesit sipas kohës lokale në zonat urbane të tre provincave, ku krimi i organizuar dhe transnacional i lidhur me trafikun e drogës ka qenë i shfrenuar, duke çuar në akte dhune.
Nën gjendjen e jashtëzakonshme, 9,000 personel me uniformë — 4,000 nga Policia Kombëtare dhe 5,000 nga Forcat e Armatosura — do të vendosen për të rivendosur paqen dhe rendin.
“Ne do ta çojmë luftën kundër kriminelëve në territorin ku ata përpiqen të fshihen,” tha Lasso, duke shtuar se paqja e ekuadorianëve “nuk do të sakrifikohet kurrë për biznesin e pistë të askujt”.
Që nga marrja e detyrës, Lasso ka nisur një luftë frontale kundër mafiozëve të drogës, të cilat fajësohen për rritjen e krimit dhe pasigurisë në muajt e fundit në të gjithë vendin.
Vala e dhunës ka përfshirë burgjet e Ekuadorit që nga viti 2021. Vetëm vitin e kaluar, mbi 300 të burgosur u vranë në trazirat e burgjeve në këtë vend të Amerikës së Jugut.
