Koreja e Veriut lëshoi dy raketa balistike në ujërat jashtë bregut lindor të Gadishullit Korean herët të hënën dhe motra e liderit Kim Jong Un paralajmëroi se do të ndodhin më shumë nëse Shtetet e Bashkuara nuk ndalojnë stërvitjet ushtarake me Korenë e Jugut.
Kim Yo Jong, një nga zyrtarët më të lartë të vendit, tha se “frekuenca e përdorimit të Oqeanit Paqësor si poligon i qitjes varet nga natyra e veprimeve të ushtrisë amerikane”, sipas një deklarate të postuar në Agjencinë Qendrore Koreane të Lajmeve (KCNA).
Testet e raketave të së hënës ishin të dytat në tre ditë, Pheniani lëshoi një raketë balistike ndërkontinentale (ICBM).
Shtetet e Bashkuara iu përgjigjën nisjes duke mbajtur stërvitje të veçanta me Korenë e Jugut dhe Japoninë të dielën, një lëvizje që Koreja e Veriut e konsideroi si një provokim, shkruan CNN.
Aleatët gjithashtu pritet të mbajnë stërvitje ushtarake muajin e ardhshëm në Gadishullin Korean.
Koreja e Veriut kishte paralajmëruar të premten për “përgjigje të forta të paprecedentë” ndaj këtyre stërvitjeve nëse ato vazhdojnë.
Ministria e Mbrojtjes e Japonisë vlerësoi se të dy raketat u lëshuan të hënën rreth orës 7:00 të mëngjesit me kohën lokale dhe ranë në Detin e Japonisë, i njohur gjithashtu si Deti Lindor, “në lindje të Gadishullit Korean, jashtë zonës ekskluzive ekonomike të Japonisë”.
Koreja e Veriut e pranoi lëshimin e së hënës, duke e quajtur atë një “stërvitje super të madhe të raketave të shumta, e cila është një mjet për sulm taktik bërthamor”./Albeu.com/
