Në ditën e 37-të të protestës qytetare përballë Kryeministrisë, një tjetër mesazh i fortë u dëgjua nga podiumi. Një grua që mori fjalën para pjesëmarrësve e përshkroi me tone të ashpra mënyrën si funksionon pushteti aktual, duke theksuar njëkohësisht se kjo revoltë duhet të ruajë patjetër qetësinë dhe të mos devijojë drejt dhunës.
Ajo argumentoi se Shqipëria nuk ndodhet vetëm në një proces të zgjatur tranzicioni, por përballet me një sistem që, sipas saj, është “diktaturë oligarkike” me shtrirje ndërkombëtare.
Të lidhura
None found
Protestuesja e vendosi theksin te fakti se kjo lëvizje duhet të mbetet paqësore, pasi vetëm kështu, sipas saj, mund të arrihet fitore e plotë.
“Nëse rrëshqasim në dhunë dështon misioni i kësaj proteste, e cila kërkon fundin e këtij tranzicioni. Ky tranzicion është një diktaturë oligarkike, është e një oligarkie të ngritur në nivelin e një mafia ndërkombëtare! Dhe koka është vetë qeveria,” deklaroi ajo prerë.
Duke e vendosur situatën e sotme përballë së kaluarës së zymtë të vendit, ajo tha se protesta ka sjellë tashmë një vlerë të rëndësishme që nuk duhet humbur: zgjimin e ndërgjegjes së njerëzve pa ndërmjetësimin e politikanëve.
“Rrëzimi i Ramës është detyrë e protestës, jo e institucioneve që mund të ngrihen në emër të protestës. Pasi të rrëzohet Rama, atëherë të ngrihen institucione, qoftë edhe një Kuvend i protestës! Këtë vlerë solli protesta”, u shpreh ajo.
