Teksa Covid-19 u përhap në të gjithë vendin dhe agjencia zyrtare KCNA raportoi gati 1.5 milion raste, ushtria e Koresë së Veriut ka filluar shpërndarjen e barnave në farmacitë e Phenianit.
Udhëheqësi i Koresë së Veriut Kim Jong Un ka vendosur një bllokim kombëtar për të frenuar përhapjen e Covid-19 dhe ka vendosur trupa për të ndihmuar në luftimin e epidemisë.
Qindra anëtarë të Ushtrisë Popullore Koreane, të veshur me uniforma kamuflazhi, u mblodhën në Phenian, sipas imazheve të transmetuara nga KCNA.
Ushtria “zgjeroi fuqinë e saj në të gjitha farmacitë në Phenian dhe filloi shpërndarjen e ilaçeve si pjesë e një shërbimi 24-orësh”, tha burimi.
Kim Jong Un të hënën kritikoi ashpër autoritetet e Koresë së Veriut për mënyrën se si e menaxhojnë epideminë, kryesisht për pamundësinë e tyre për të mbajtur farmacitë hapur 24 orë në ditë.
Që nga e enjtja e kaluar, kur vendi njoftoi rastin e parë të Covid-19, lideri i Koresë së Veriut ka marrë personalisht menaxhimin e luftës kundër epidemisë, e cila, sipas tij, ka shkaktuar “trazira të mëdha” në Korenë e Veriut./albeu.com/
