Kievi kundërshtoi njoftimin se presidenti rus Vladimir Putin së fundmi vizitoi sërish zonat e luftës në Ukrainë, duke pretenduar se ai nuk shkoi vetë, por dërgoi një sozi.
“Ky nuk ishte Putini i vërtetë”, tha sekretari i Këshillit të Sigurisë Kombëtare Oleksii Danilov për televizionin ukrainas, pa dhënë asnjë provë. “Për të folur me Putinin e vërtetë, duhet të jesh në izolim për 10 deri në 14 ditë”, vazhdoi ai.
Sipas një njoftimi për shtyp të Kremlinit, presidenti rus së fundi udhëtoi në zonën e luftës në Ukrainë, u takua me ushtarakët rusë që luftonin në vijën e frontit në rajonet Kherson dhe Lugansk dhe u konsultua me oficerë të lartë.
Kjo është vizita e dytë e shpallur nga zoti Putin në territorin ukrainas pasi urdhëroi ushtrinë ruse të pushtonte vendin fqinj më 24 shkurt 2022. Data e saktë e vizitës së presidentit rus nuk u specifikua. Kremlini publikoi një video të shkurtër që tregon Vladimir Putinin duke dalë nga një helikopter dhe duke shtrënguar duart me ushtarët me uniformë.
Sipas Danilov, personi që shkoi në Kherson ishte një “spiun” i Putin. Zyrtari ukrainas pohoi gjithashtu se presidenti i Rusisë është “i frikësuar” dhe për këtë arsye është e pamundur që ai të vendosë të vizitojë ushtarët në vijën e frontit.
Sipas Danilov, presidenti ukrainas Volodymyr Zelensky është një rast “diametralisht i kundërt”, pasi ai ka vizituar vazhdimisht frontet, ndërsa Vladimir Putin, sipas tij, është një “gjysh i fshehur në bodrum”, ai së shpejti “do të ketë frikë nga vetja”. /albeu.com
