Më shumë se 30 mijë persona kanë kaluar nga Shqipëria drejt Greqisë përmes pikës kufitare të Kapshticës gjatë katër ditëve të fundit, duke shënuar një fluks të konsiderueshëm lëvizjesh.
Udhëtarët janë kryesisht emigrantë shqiptarë që kishin ardhur në vend për të kaluar pushimet dhe që tani po nisen drejt Greqisë, aty ku jetojnë dhe punojnë.
Të lidhura
None found
Numri i lartë i kalimeve ka shkaktuar radhë të gjata automjetesh në pikën kufitare. Sipas udhëtarëve, koha e pritjes arrin deri në dy orë, ndërsa temperaturat e larta e vështirësojnë më tej qëndrimin në kufi.
Për të menaxhuar fluksin, në të dyja anët e kufirit janë në funksion nga katër sportele për përpunimin e udhëtarëve dhe automjeteve, me synim uljen e kohës së pritjes.
Radha shtrihet edhe në zonën neutrale, ku emigrantët qëndrojnë në automjetet e tyre duke pritur për përfundimin e procedurave, në kushtet e temperaturave të larta.
Kapshtica mbetet një prej pikave kryesore të kalimit për emigrantët shqiptarë gjatë sezonit të verës. Lëvizjet pritet të jenë të shumta edhe gjatë ditëve të ardhshme, pasi emigrantët po mbyllin pushimet dhe po kthehen në vendet ku jetojnë.
