Izraeli dhe Hamasi kanë rënë dakord për një zgjatje dy-ditore të armëpushimit në Rripin e Gazës, me kusht që grupi militant palestinez të lirojë 20 pengje të tjera, 10 çdo ditë, sipas një zyrtari të lartë izraelit.
Një grup i ri prej 11 pengjeve të liruar nga Hamasi dje u kthyen në Izrael në mbrëmje, të gjithë ishin gra dhe fëmijë.
Zgjatja dy-ditore e armëpushimit midis Izraelit dhe Hamasit do të hynte në fuqi kur Hamasi liroi grupin e katërt të pengjeve, sipas Mark Regev, një këshilltar i lartë i kryeministrit izraelit.
Hamasi publikoi edhe videon e lirimit të grupit të 4-të të pengjeve, të cilët mbërritën mbrëmë në Qendrën Mjekësore të Tel Aviv Shurasky ku do të ribashkohen me familjet e tyre për herë të parë pas rreth 52 ditësh.
Siç raportojnë mediat izraelite, qeveria Netanyahu ka marrë listën me emrat e 10 pengjeve që do të lirohen sot nga Hamasi dhe ka njoftuar familjet e tyre.
Izraeli miratoi gjithashtu listën e 50 të burgosurve palestinezë që do të lirohen.
Presidenti amerikan Joe Biden vlerësoi armëpushimin dhe tha në një deklaratë: “Ne nuk do të ndalemi derisa të lirohen të gjithë pengjet e mbajtura nga terroristët e Hamasit”./albeu.com
