Selia e Kuvendit të Shqipërisë, është pajisur me një rrethim të plotë me barriera metalike, teksa sot pritet të zhvillohet seanca plenare.
Bëhet me dije se përfaqësuesit e maxhorancës socialiste kanë zgjedhur të futen në godinë nga një portë anësore, ajo që ndodhet pranë godinës së Akademisë së Shkencave.
Të lidhura
None found
Ndërkohë, hyrja kryesore e institucionit është e bllokuar nga strukturat metalike që shtrihen në të gjithë periferinë e ndërtesës.
Masat e forcuara vijnë pas ngjarjeve të së enjtes, kur seanca e mëparshme plenare u shoqërua me përleshje midis qytetarëve të mbledhur në protestë dhe forcave të rendit. Një grup protestuesish qëlluan me vezë ligjvënësit, çka shtyu policinë të ndërhynte duke i dërguar disa prej tyre në komisariat. Po atë ditë, disa të tjerë arritën të dëmtonin rrethimin metalik dhe provuan të depërtojnë drejt ambienteve të brendshme të Parlamentit, veprim që detyroi uniformat blu të aplikonin edhe gaz lotsjellës.
Si pasojë e këtyre episodeve, autoritetet shoqëruan dhe ndaluan gjithsej 20 individë. Bilanci përfshinte 9 punonjës policie të plagosur dhe 5 protestues të dëmtuar.
