Jemi vetëm 10 ditë larg natës së ndërrimit të viteve, por gjeli i detit konsiderohet i “paarritshëm” për shumë familje në Elbasan.
Aktualisht një kg peshë e gjallë tregtohet 1000-1200 lekë, e duke qenë përballë ҫmimeve në rritje kjo është panorama që ofron tregu i shpendëve në Elbasan.
Fermerë e blerës janë të paktë në numër.
Edhe fermerët e gjelave ndjehen keq për fuqinë e ulët blerëse në treg, pasi kanë bërë shpenzime të shumta për rritjen e tyre.
Ata thonë se qytetarët vijnë pyesin dhe shumicën e rasteve largohen pa blerë asgjë.
Me shumë mundësi këtë fundviti, gjeli i detit do të mungojë në tryezat festive të shumë familjeve elbasanase.
Çmimet e larta, kriza ekonomike dhe të ardhurat e pakta e bëjnë të vështirë blerjen e tij.
Çmimi i gjelit të detit është rritur ndjeshëm në krahasim me një vit më parë, kur blihej 700-800 lekë/kg peshë e gjallë.
Nuk janë vetëm pensionistët që e kanë të pamundur blerjen e tij.
