Kameramani shqiptar, Sylejman Kllokoqi, në një intervistë për emisionin “Abc-ja e mëngjesit” rrëfeu momentin kur xhiroi masakrën e Reçakut në Janar të vitit 1990. Gjatë intervistës me Skype, kameramani tregoi se kur përfunduan luftimët në Reçak shkoi për të parë se çfarë kishte ndodhur atje.
Sylejmani, i cili punonte për Associated Press rrëfen se nuk do t’i harrojë asnjëherë pamjet e atij fshati, ku gjeti të vrarë mizorisht fëmijë dhe të rritur. Ai tregon ndër të tjera se pavarësisht pamjeve të frikshme që po shihte, i duhej të filmonte, për t’i treguar botës se çfarë kanë bërë serbët mbi shqiptarët e Kosovës.
“Çdo ditë kam tentuar të shkoj. Ditën e tretë kur iu afrova Reçkut më thanë disa banorë, ku i pyeta se çfarë po ndodh në Reçak. Ata më thanë se është larguar policia. Hymë brenda me fotografin, pamë gjithë atë masakër që ka ndodhur në fshat. Është xhirimi i parë, njeriu pa kokë, ku kishin dalë banorët dhe i kërkonin kokën. Më vonë fillova të shkoj lart në xhirimet e tmerrshme me 45 kufoma.
I filmuam dhe i dërgova në Prishtinë. Më vonë nga ora 11, fillova të xhiroj ku erdhi dhe misioni verifikues i OSBE ku e cilësoi si masakër shumë të madhe, një javë ditë sa ka zgjatur kemi qenë prezent në Reçak.”, rrëfeu ai. Më tej, ai flet për rëndësinë e këtyre pamjeve, pa të cilat bota nuk do ta besonte se çfarë po bëhej. Sylejmani përmend masakra të tjera që fatkeqësisht nuk janë dokumentuar me filmime.
“Si Reçaku është dhe masakra e Obrisë që kam xhiruar. Fotoja ku është nëna me dy fëmijë solli për herë të parë misionin në Kosovë. Hynë trupat nga Perëndimi, ka qenë një arritje shumë e madhe. Pas asaj ishte Reçaku, që filloi mekanizmin botëror. Në Kosovë ka pasur masakra më të mëdha por nuk kanë qenë të flimuara dhe e ke të vështirë që t’i tregosh botës se çfarë ka ndodhur.”, tha ai. /abcnews.al
