Mbrëmjen e sotme qyteti i Shkodrës u trondit nga një atentat mafioz ndaj Bardhok Pllanajt.
46 vjeçari u vra me kallanikov brenda makinës së tij ndërsa arma u gjet brenda një makine të djegur vetëm pak metra larg vendngjarjes, siç ndodh tashmë rëndomë në atentatet në Shqipëri.
Pllanaj u vu në qendër të ciklonit politik në Shqipëri pasi opozita akuzoi mazhorancën se ai ishte fshehur në makinën e ish-deputetit Mark Frroku, ndërkohë që policia e kërkonte si të dyshuarin kryesor për transport droge drejt Italisë në operacionin që mori emrin “Laguna e Vilunit”.
Njoftimi i policisë:
Më datë 04.04.2021, rreth orës 21:10, në fshatin Dobraç i Ri, Njësia Administrative Rrethina, Shkodër, duke udhëtuar me automjet është vrarë me armë zjarri shtetasi Bardhok Pllanaj rreth 46 vjeç banues në Shkoj i Ri.
Shërbimet e Policisē kanë rrethuar zonën dhe kanë ngritur pika kontrolli.
Në ndihmë të Policisë lokale kanë shkuar dhe grupe të FNSH Shkodër
Veprimet po kryhen me grup hetimor nën drejtimin e Prokurorisë së Rrethit Gjyqësor Shkodër për zbardhjen e plotë të rrethanave të kësaj ngjarje, identifikimin dhe kapjen e autorëve. /albeu.com/
