Protesta e qytetarëve të Divjakës kundër propozimit për reformën territoriale ka hyrë në ditën e 49-të. Banorët kundërshtojnë bashkimin e bashkisë së tyre me Lushnjën.
Qytetarët kërkojnë që Divjaka të vijojë të funksionojë si bashki më vete, duke theksuar se ruajtja e institucionit vendor garanton shërbime më pranë komunitetit dhe mbron identitetin e zonës.
Të lidhura
None found
Gjatë protestës së mbrëmjes në sheshin e qytetit u dëgjuan sërish thirrje kundër ndryshimit të statusit të bashkisë. Edhe pse pjesëmarrja ishte më e ulët në krahasim me ditët e para, protestuesit deklaruan se do ta vazhdojnë qëndresën.
Banorët e Divjakës kundërshtojnë përfshirjen e qytetit në bashkinë e Lushnjës dhe kërkojnë të drejtën për të zgjedhur vetë drejtuesit vendorë. Sipas tyre, ndaj këtyre drejtuesve duhet të kenë më pas mundësi të kërkojnë llogari për mënyrën se si qeveriset bashkia.
Pas përfundimit të protestës së 49-të, qytetarët zhvilluan një marshim në rrugët e qytetit, duke përsëritur kërkesën për ruajtjen e statusit të Divjakës si bashki.
“Divjaka bashki!” ishte ndër sloganet kryesore të protestuesve.
