Ish-kryeministri Sali Berisha deklaroi se grupi parlamentar nuk do të marrë pjesë në mbledhjet e Kuvendit, por do të vijojë punën në komisione, derisa qeveria të lejojë diskutimin e amendamenteve të dorëzuara nga deputetët demokratë, që synojnë ndryshimin e ligjeve të kërkuara nga qytetarët e mbledhur në protestë.
Të gjithë përfaqësuesit e Partisë Demokratike respektuan urdhrin e kreut të tyre dhe nuk u paraqitën në sallën e seancës. Asnjëri prej tyre nuk e vuri në pikëpyetje vendimin e Berishës, duke e lënë sallën bosh nga ana e opozitës. Mungesa në seancat plenare do të zgjasë deri në fund të sesionit, nëse shumica vijon të mos pranojë projektligjet që synojnë shfuqizimin e akteve që prekin zonat e mbrojtura, një qëndrim që përputhet plotësisht me kërkesat e protestuesve në bulevard.
Të lidhura
None found
Katër nismat ligjore të PD-së përfshijnë: projektligjin për heqjen e ndryshimeve në ligjin për zonat e mbrojtura, shfuqizimin e ligjit për investimet strategjike, anulimin e Paketës së Maleve dhe shfuqizimin e disa dispozitave të ligjit për trashëgiminë kulturore.
Ndërkohë, java e demokratëve nisi me bojkot parlamentar, por edhe me një hap në Prokurorinë e Posaçme. Kryetari i grupit, Gazment Bardhi, shkoi në SPAK për të depozituar një kallëzim penal ndaj kryeministrit Edi Rama dhe ministrit Blendi Gonxhe. Në dokument, PD i akuzon për “Shpërdorim detyre” dhe “Shkelje të barazisë në tendera” në lidhje me financimin prej 4.2 milionë eurosh të eventit të Kanye West.
