Një zjarr i përmasave të mëdha që përfshiu një resort turistik në Bayahibe, zonë bregdetare në juglindje të Republikës Dominikane, ka shkaktuar të paktën një viktimë dhe ka detyruar evakuimin e rreth 1,700 turistëve.
Ngjarja ndodhi në orët e para të mëngjesit, kur flakët shpërthyen në kompleksin hotelier dhe krijuan panik mes pushuesve. Përballë situatës, autoritetet nisën një operacion të gjerë evakuimi, ndërsa turistët u zhvendosën në hotele të tjera dhe në ambiente të sigurta në zonë.
Të lidhura
None found
Viktima, sipas autoriteteve, është një turiste italiane 46-vjeçare, e cila humbi jetën si pasojë e asfiksisë nga tymi. Gjatë operacioneve të kërkimit u gjet trupi i saj, i cili më pas u dërgua për ekzaminime mjeko-ligjore.
Në ndërhyrjen për shuarjen e flakëve u përfshinë dhjetëra zjarrfikës, forca të mbrojtjes civile dhe ekipe të specializuara të emergjencës. Po ashtu, autoritetet vendore dhe strukturat e sigurisë morën pjesë në koordinimin e evakuimit dhe në sigurimin e perimetrit të zonës.
Sipas sqarimeve zyrtare, objektet turistike pranë resortit nuk pësuan dëme të konsiderueshme, por një pjesë e tyre u boshatisën përkohësisht për arsye sigurie. Shumë prej turistëve të larguar nga resorti i përfshirë nga zjarri janë akomoduar në struktura të tjera hoteliere të zonës.
Ndërkohë, autoritetet kanë nisur hetimet për të zbardhur shkaqet e zjarrit. Vlerësimet paraprake tregojnë se përhapja e shpejtë e flakëve mund të jetë ndihmuar nga materialet e ndezshme të përdorura në strukturën e godinës, si edhe nga kushtet atmosferike në zonë.
Rezultatet e para të hetimit pritet të bëhen publike pasi të kenë përfunduar plotësisht operacionet në vendngjarje.
