Steve Witkoff dhe Jared Kushner, të dërguarit e posaçëm të presidentit amerikan Donald Trump, mund të udhëtojnë për herë të parë drejt Kievit, si pjesë e një nisme për t’i dhënë shtysë të re diplomacisë që synon përfundimin e luftës në Ukrainë.
Të lidhura
None found
Presidenti ukrainas Volodymyr Zelensky deklaroi në një intervistë për Axios se dy zyrtarët mund të mbërrijnë në kryeqytetin ukrainas brenda dy javëve të ardhshme. Sipas tij, mundësia e vizitës është një prej rezultateve konkrete të takimit të fundit që zhvilloi me presidentin amerikan.
Financial Times, duke iu referuar burimeve në dijeni të bisedimeve në Shtëpinë e Bardhë, raportoi se një udhëtim i tillë u diskutua gjatë takimit ndërmjet Donald Trump dhe homologut të tij ukrainas, Volodymyr Zelensky.
Për autoritetet në Kiev, ardhja e Witkoff dhe Kushner konsiderohet një rast për të thelluar raportet me administratën amerikane, si edhe për të siguruar mbështetje të re ushtarake nga Shtetet e Bashkuara gjatë mandatit të dytë të Trump.
Nëse udhëtimi konfirmohet, kjo do të shënojë vizitën e parë të dy të dërguarve amerikanë në Ukrainë, pasi më herët ata kanë kryer disa udhëtime në Rusi.
Zelensky tha se gjatë takimeve synon të trajtojë mundësinë e rikthimit të negociatave të paqes me Rusinë. Gjithashtu, ai dëshiron që Witkoff dhe Kushner të njihen drejtpërdrejt me realitetin në terren dhe dëmet e shkaktuara nga lufta.
Sipas kreut të shtetit ukrainas, të dy të dërguarit përkrahin vendosjen e një armëpushimi që do të hapte rrugën për një proces diplomatik. Megjithatë, Zelensky shprehu dyshime se presidenti rus Vladimir Putin do të pajtohej me ndërprerjen e luftimeve.
Megjithë skepticizmin e tij, presidenti ukrainas nënvizoi sërish se Ukraina është e gatshme të rikthehet në tryezën e bisedimeve me Rusinë, me objektivin për t’i dhënë fund konfliktit që vijon prej më shumë se katër vitesh.
