Një shembull i spikatur korrektësie po pushton rrjetet sociale në Amerikë, teksa një biznesmen nga Karolina e Jugut gjeti 12 mijë dollarë të fshehur në një kuti të vjetër veglash dhe vendosi t’i kthente pronarit të dikurshëm.
Të lidhura
None found
Sak Yiengjuntuek, i cili drejton restorantin “Lemongrass Pho & Thai Cuisine” në Myrtle Beach, u përball me zbulimin ndërkohë që po rregullonte objektet e lëna pas nga paraardhësi i tij në aktivitet, pasi kishte marrë në zotërim lokalin në prill 2025.
Teksa po inspektonte disa kuti me pajisje, hapi njërën prej tyre dhe brenda gjeti një mbajtëse syzesh dielli. Pasi e çeli, aty pa një sasi të konsiderueshme monetare.
“Mbeta pa fjalë. Në atë çast e kuptova që shuma i takonte ish-pronarit”, rrëfeu Yiengjuntuek për shtypin amerikan.
Menjëherë provoi të lidhej me paraardhësin për t’ia rikthyer paratë, por kontakti që dispononte nga dokumentacioni i aktivitetit doli i pavlefshëm.
Në pamundësi për ta lokalizuar ndryshe, pronari i restorantit iu drejtua një televizioni vendor, me shpresën se publikimi i rastit do ta ndihmonte të identifikonte pronarin e vërtetë të parave.
Gjatë një interviste të drejtpërdrejtë në atë televizion, Yiengjuntuek iu kujtua se ruante një tjetër numër celulari të regjistruar me një emër tjetër. E thirri aty për aty dhe, për habi të tij, personi iu përgjigj.
“Kam një lajm të mrekullueshëm për ty”, i tha në telefon, duke e njoftuar se i kishte gjetur kursimet e humbura.
Më pas u bë e ditur se zotëruesi i shumës monetare po luftonte me një gjendje të rënduar shëndetësore, çka e bëri kthimin e tyre edhe më kuptimplotë.
Gesti i Yiengjuntuek u duartrokit nga banorët e Myrtle Beach, ndërsa vetë ai shprehu dëshirën që ngjarja e tij të frymëzojë edhe të tjerët.
“Bëj gjënë e duhur. Mos e braktis kurrë ndershmërinë”, ishte apeli i tij.
