Nëntë persona u transportuan në spital pasi një avion që fluturonte nga Kolumbia drejt Nju Jorkut u përball me turbulenca të fuqishme gjatë orëve të mëngjesit. Për shkak të incidentit, pilotët e devijuan fluturimin dhe e ulën në Aeroportin Ndërkombëtar të Miamit.
Të lidhura
None found
Fluturimi AV42, i operuar nga kompania ajrore Avianca, ishte nisur nga Medellin i Kolumbisë dhe kishte si destinacion Aeroportin Ndërkombëtar JFK të Nju Jorkut.
Autoritetet e Aeroportit të Miamit bënë të ditur se avioni hasi turbulenca të forta gjatë rrugëtimit.
Pas uljes emergjente në Miami, ekipet e shërbimeve të emergjencës ndërhynë për t’u ardhur në ndihmë personave që kishin pësuar lëndime ose probleme shëndetësore si pasojë e turbulencave.
Avianca konfirmoi për CBS News Miami se në total kërkuan trajtim mjekësor gjashtë pasagjerë dhe tre anëtarë të ekuipazhit.
Administrata Federale e Aviacionit të SHBA-së (FAA) deklaroi se do të hetojë rrethanat e incidentit.
Autoritetet nuk kanë bërë ende të ditur informacione të tjera lidhur me gjendjen dhe shkallën e lëndimeve të nëntë personave të dërguar në spital.
