Të dhënat mbi lëvizjen globale të anijeve, të cituara nga mediat e huaja, sugjerojnë se Irani mund të mos e kontrollojë më plotësisht një prej korridoreve kryesore të Ngushticës së Hormuzit.
Të lidhura
None found
Ky ndryshim po ndodh ndërsa presidenti amerikan Donald Trump këmbëngul se SHBA-ja ushtron “kontroll të plotë” mbi ngushticën. Në të njëjtën kohë, Teherani vijon të deklarojë se ky korridor strategjik ujor mbetet nën kontrollin e tij.
Kpler, kompani që gjurmon trafikun detar duke përdorur të dhëna satelitore, radarë dhe informacione nga portet, raporton se më shumë se 80 për qind e naftës bruto të transportuar përmes Hormuzit gjatë dy javëve të fundit ka kaluar në itinerarin pranë ujërave të Omanit. Ky korridor njihet nga Kombet e Bashkuara, ndërsa Irani e cilëson përdorimin e tij si shkelje të sovranitetit që pretendon mbi ngushticën.
Situata paraqet një kthesë të ndjeshme në raport me një muaj më parë, kur trafiku tregtar në këtë rrugë ishte thuajse inekzistent. Sipas analistëve të Kpler, këto zhvillime mund të shihen si tregues se Republika islamike ka humbur, të paktën pjesërisht, kontrollin mbi këtë segment të ngushticës.
Nga 1 deri më 19 gusht, përmes Hormuzit lundruan 236 anije. Korridorin iranian e përdorën vetëm 83 prej tyre, kurse 148 të tjera kaluan me transponderët të çaktivizuar, me synimin për të zvogëluar mundësinë e identifikimit dhe të shënjestrimit nga ndonjë sulm.
Portali amerikan Axios bën të ditur se prej disa javësh SHBA-ja po administron në heshtje rrugën e lundrimit pranë ujërave të Omanit. Gjatë çdo nate, afërsisht 15 deri në 20 cisterna lëvizin në dy kolona, njëra për hyrjen dhe tjetra për daljen nga ngushtica, nën koordinimin e një task-force amerikane.
Sipas Shteteve të Bashkuara, kjo mënyrë organizimi ka mundësuar rikthimin në qarkullim të rreth 10 milionë fuçive naftë në ditë. Kjo sasi përfaqëson rreth gjysmën e nivelit të regjistruar përpara luftës, por është dukshëm më e lartë se ajo e muajve të krizës.
