Bilanci i viktimave nga tërmeti i fuqishëm që goditi më 15 gusht provincën Nusa Tenggara Lindore në Indonezi ka shkuar në 100. Ekipet e shpëtimit kanë vijuar përpjekjet për gjetjen e personave të zhdukur, në ditën e 10-të të operacionit.
Të lidhura
None found
Lëkundja me magnitudë 7.7 u pasua nga mijëra tërmete të tjera, të cilat shkaktuan dëme të mëdha. Më shumë se 73,000 banesa u shkatërruan, ndërsa rreth 180,000 njerëz u detyruan të largoheshin nga zonat e prekura.
Sipas kreut të agjencisë së menaxhimit të fatkeqësive, Suharyanto, numri i të vdekurve u rrit pasi disa prej të plagosurve që ndodheshin në spital nuk mundën t’u mbijetonin plagëve. Ai bëri të ditur gjithashtu se mbi 1,600 persona janë plagosur.
Ndihmat për banorët e prekur po dërgohen përmes helikopterëve, kamionëve dhe motoçikletave, deklaroi Suharyanto.
Ky konsiderohet tërmeti më vdekjeprurës në Indonezi që prej vitit 2022. Në atë vit, një tërmet i cekët me magnitudë 5.6 shkaktoi vdekjen e qindra personave në Java.
Indonezia ka rreth 290 milionë banorë dhe ndodhet në Unazën e Zjarrit të Paqësorit. Kjo zonë është veçanërisht aktive nga pikëpamja sizmike, pasi aty takohen pllakat tektonike dhe tërmetet, ashtu si edhe shpërthimet vullkanike, janë të shpeshta.
