Tërmeti i fuqishëm që goditi të martën Japoninë shkaktoi dëme të konsiderueshme në qytetin Kashima, ku një qendër tregtare u dëmtua rëndë. Një shpërthim, që dyshohet se erdhi si pasojë e rrjedhjes së gazit, përkeqësoi edhe më tej gjendjen e strukturës.
Të lidhura
None found
Aeon Mall ishte një nga objektet më të prekura nga lëkundjet. Gjatë tërmetit, kati i dytë i ndërtesës u shemb, dhe menjëherë më pas një eksplozion i fortë shkaktoi shkatërrime të mëdha. Megjithëse qindra klientë dhe staf u nxorën jashtë, autoritetet dyshojnë se disa persona mund të kenë mbetur ende të bllokuar mes rrënojave.
Sipas dëshmitarëve, paniku ishte i menjëhershëm. Takateru Sonoda, i cili zotëron një sallon flokësh dhe një kafene afër zonës tregtare, e përshkroi ngjarjen si një shpërthim bombe. Ai tregoi se sirenat u aktivizuan menjëherë, turma nisi të vraponte në të gjitha drejtimet dhe kaosi pushtoi rrugët përreth.
Rreth 170 ushtarë u dërguan në vendin e ngjarjes për të mbështetur ekipet e kërkim-shpëtimit, njoftuan burimet zyrtare.
Punonjësit e kompleksit tregtar rrëfyen se lëkundjet zgjatën afro 10 sekonda dhe ndërtesa u mbulua shpejt nga re pluhuri. Ata ndoqën procedurat standarde për evakuimin e vizitorëve, por disa prej tyre u rikthyen brenda pak çaste para se të ndodhte shpërthimi.
Një tjetër dëshmitar, Kazuya Tsurunaga, që gjendej rreth 300 metra larg vendit të ngjarjes, tha se pas eksplodimit u formua një re e dendur tymi dhe hiri u shpërnda në gjithë zonën, duke i ngjarë “hirit vullkanik”.
Mediat japoneze kanë transmetuar pamje dramatike të momenteve pas tërmetit, të cilat tregojnë shkatërrimin e madh në qendrën tregtare. Ky kompleks ishte riçelur vetëm një muaj më parë, pas punimeve restauruese për shkak të dëmeve të shkaktuara nga tërmeti i vitit 2016.
