Dëmtimi me ritme të shpejta i natyrës dhe përkeqësimi i krizës klimatike po shndërrohen në kërcënime gjithnjë e më serioze për ekonominë botërore dhe qëndrueshmërinë financiare, sipas paralajmërimit të një zyrtari të lartë të Bankës Qendrore Europiane.
Të lidhura
None found
Anëtari i bordit ekzekutiv të BQE-së, Frank Elderson, bëri të ditur se institucioni po intensifikon mbikëqyrjen e rreziqeve financiare të lidhura me degradimin e të ashtuquajturave “shërbime të ekosistemit”. Këtu përfshihen burimet dhe proceset natyrore mbi të cilat mbështeten veprimtaria njerëzore dhe ekonomia.
Elderson theksoi se këto shërbime po dobësohen me shpejtësi dhe nuk mund të konsiderohen të qëndrueshme, çka, sipas tij, shpjegon edhe përdorimin e termit krizë e klimës dhe natyrës.
Ai vlerësoi se ekonomia është shumë më e varur nga natyra sesa perceptohet zakonisht. Për pasojë, degradimi i saj mund të prekë drejtpërdrejt bankat, kreditimin, inflacionin dhe ritmet e rritjes ekonomike.
Këto deklarata bëhen ndërsa Evropa po përjeton pasoja të rënda nga temperaturat rekord dhe zjarret në shkallë të gjerë. Sipas Guardian, flakët në Francë dhe Spanjë kanë shkatërruar sipërfaqe të mëdha toke, banesa dhe biznese, duke sjellë kosto të konsiderueshme ekonomike krahas humbjeve në njerëz.
Sipas Elderson, ngrohja globale po i bën fatkeqësitë natyrore më të shpeshta, ndërsa efektet e tyre përbëjnë rrezik për stabilitetin financiar.
Ai nënvizoi se shkatërrimi i natyrës cenon vetë themelin mbi të cilin mbështeten ekonomitë. Për këtë arsye, çështja nuk duhet parë vetëm si një problem mjedisor, por si një element thelbësor i ekonomisë dhe i qëndrueshmërisë së sistemit financiar.
Në rolin e saj si mbikëqyrëse e bankave më të mëdha të Evropës, Banka Qendrore Europiane ka filluar një program për të shqyrtuar ndikimin që degradimi i natyrës mund të ketë mbi sistemin bankar. Më vonë gjatë këtij viti, institucioni pritet të publikojë një analizë se si dëmtimi i ekosistemeve mund t’u shkaktojë humbje nga kreditë bankave të zonës euro.
Frank Elderson ishte gjithashtu një prej figurave që themeluan në vitin 2017 Rrjetin për Gjelbërimin e Sistemit Financiar, NGFS, së bashku me drejtues të tjerë të bankave qendrore ndërkombëtare.
Nismat klimatike brenda sektorit financiar, megjithatë, janë përballur me kundërshtime, veçanërisht gjatë presidencës së Donald Trump në SHBA. Trump i largoi Shtetet e Bashkuara nga NGFS, duke ia lënë Evropës rolin udhëheqës në përpjekjet për administrimin e rreziqeve klimatike në financa.
Elderson deklaroi se industria bankare evropiane tashmë e ka pranuar se kërcënimet që burojnë nga klima dhe dëmtimi i natyrës nuk mund të shpërfillen më. Sipas tij, sot do të ishte tepër e vështirë të gjendej në Evropë një bankë që të pohonte sinqerisht se kjo çështje nuk ka rëndësi, pasi ajo periudhë tashmë ka përfunduar.
