Juan José Mutilba, një biznesmen spanjoll në pension nga Burgos, rezulton i zhdukur në Mesdhe që prej 18 gushtit, kur përfundoi në ujë pasi rrëshqiti nga varka e tij me vela. Familjarët po u bëjnë thirrje autoriteteve italiane dhe greke të vënë në dispozicion më shumë mjete për gjetjen e 66-vjeçarit.
Të lidhura
None found
Ngjarja ndodhi në një hapësirë detare ndërmjet Siçilisë dhe Greqisë. Alarmi, megjithatë, u dha më 21 gusht, tri ditë pas rënies së tij në det, sepse partnerja që e shoqëronte nuk arriti ta ndalte varkën dhe nuk kishte mundësi të kontaktonte autoritetet.
Djali i tij, Sergio Mutilba, ka treguar se i ati po përpiqej të kapte një ton kur shkeli mbi gjakun e peshkut, humbi ekuilibrin dhe ra në ujë. Juan José i kërkoi me të bërtitura partneres që të ndalonte mjetin lundrues, por ajo u kap nga paniku dhe nuk mundi ta manovronte.
Sipas familjes, në zhvillimin e situatës mund të ketë ndikuar edhe fakti se varka ishte e re dhe më e madhe se ajo që çifti përdorte më parë. Ndërsa Juan José kishte përvojë të gjatë në lundrim, partnerja e tij nuk ishte familjarizuar ende me drejtimin e këtij mjeti.
Për tri ditë, partnerja e 66-vjeçarit qëndroi e vetme në det, teksa varka vijonte të lundronte. Tashmë ajo është kthyer në Madrid, ku po qëndron pranë motrës së saj dhe po merr ndihmë mjekësore e psikologjike.
Sergio qëndroi për disa ditë në Pylos, destinacioni ku prindërit e tij duhej të mbërrinin pas nisjes nga Siçilia. Ai thotë se nëna e tij është në një gjendje të rënduar psikologjike dhe se nuk arrin ta pranojë atë që ka ndodhur.
Sipas tij, ajo dëshironte të qëndronte atje derisa të gjendej babai i tij. Sergio ka shprehur gjithashtu shqetësim të madh për tri ditët që e ëma kaloi e vetme në det.
Operacioni për lokalizimin e Juan José po zhvillohet në koordinim mes autoriteteve të Italisë dhe Greqisë. Familja informohet për ecurinë e kërkimeve nëpërmjet shërbimit spanjoll të shpëtimit detar, Salvamento Marítimo.
Sergio thotë se autoritetet i kanë bërë të ditur familjes se zona është kontrolluar disa herë dhe se do t’u përcillen rregullisht të dhëna të reja mbi operacionin. Pavarësisht kësaj, të afërmit kërkojnë shtimin e burimeve të angazhuara për gjetjen e 66-vjeçarit.
Në një prononcim për median spanjolle “El País”, Sergio u shpreh se familja dëshiron që kërkimet të mos ndërpriten. Ai pranoi se situata është shumë e vështirë, por theksoi se ata vazhdojnë të kenë shpresë.
Djali i të zhdukurit ka kontaktuar edhe Ministrinë e Brendshme të Spanjës. Megjithatë, familjarët thonë se ende nuk u është dhënë një shpjegim i plotë për mënyrën se si po kryhet operacioni i kërkim-shpëtimit.
Juan José kishte dalë në pension në vitin 2021. Gjatë karrierës së tij, ai kishte ngritur fillimisht një kompani IT dhe më vonë një biznes për shpërndarjen në zyra të kontejnerëve të ujit.
Pas pensionimit, ai dhe partnerja e tij kishin udhëtuar në vende të ndryshme të botës, veçanërisht në zonën e Mesdheut. Gjatë këtij viti, çifti bleu një varkë më të madhe, e cila ishte njëkohësisht edhe më e ndërlikuar për t’u përdorur.
Sergio shpjegon se babai i tij e drejtonte varkën në mënyrë të përsosur falë përvojës së tij në lundrim, ndërsa mendon se nëna e tij mund të mos kishte të njëjtën aftësi në përdorimin e saj.
Ai ka rrëfyer edhe çastin kur mbërriti në Pylos dhe pa varkën e prindërve. Sipas tij, vetëm atëherë e kuptoi plotësisht peshën e situatës: pamja e detit, e mjetit lundrues dhe e sendeve që ndodheshin brenda i solli në mendje shumë mendime dhe e bëri momentin jashtëzakonisht të vështirë.
Familja po pret çdo njoftim të ri nga autoritetet. Sergio këmbëngul se, pavarësisht vështirësive të operacionit, kërkimi duhet të vijojë derisa të jenë provuar të gjitha mundësitë.
Ai pranon se gjetja e babait të tij do të jetë shumë e vështirë, por përsërit se familja ende nuk e ka humbur shpresën.
