Një marrëveshje për rikthimin e lundrimit të lirë në Ngushticën e Hormuzit mund të arrihet së shpejti, ndërsa negociatat mes Omanit dhe Iranit kanë shënuar përparim, deklaroi për Reuters një zyrtar amerikan.
Të lidhura
None found
Burimi bëri të ditur se Shtetet e Bashkuara do të heqin bllokadën detare ndaj porteve iraniane menjëherë pasi të njoftohet një marrëveshje që garanton kalimin e papenguar të anijeve tregtare.
“Bisedimet mes Omanit dhe Iranit për Ngushticën e Hormuzit kanë avancuar dhe ne presim që së shpejti të arrihet një marrëveshje”, u shpreh zyrtari amerikan.
Megjithatë, ai nënvizoi se çdo hap i Uashingtonit do të varet nga përmbushja e detyrimeve të marra përsipër nga Irani.
“Si gjithmonë, masat e SHBA-së do të kushtëzohen nga zbatimi i angazhimeve të Iranit”, shtoi ai.
Ngushtica e Hormuzit konsiderohet një prej korridoreve detare më të rëndësishme në botë për transportin e naftës dhe gazit. Për këtë arsye, një marrëveshje që siguron lundrimin e mbrojtur në këtë zonë pritet të ndikojë ndjeshëm në tregjet globale të energjisë.
