Një burrë 61-vjeçar nga Serbia, i cili u tërhoq pjesërisht nga dritarja e një aeroplani të kompanisë Ryanair, ka treguar për herë të parë detaje nga ngjarja e tmerrshme që i solli përvojën më të rëndë të jetës gjatë një udhëtimi nga Greqia për në Gjermani.
Të lidhura
None found
Mbijetesa e tij u bë e mundur falë rripit të sigurisë dhe reagimit të shpejtë të udhëtarëve të tjerë, teksa autoritetet vazhdojnë të hetojnë se çfarë e shkaktoi këtë incident të rrallë.
Në një bashkëbisedim për median britanike “The Guardian”, biznesmeni Ljubisa Karovic tregoi se momenti që nuk i ndahet nga mendja është krisma e fuqishme që i parapriu çarjes së xhamit të avionit.
“Ajo që më ka mbetur në kujtesë është shpërthimi. Ishte tingulli përpara se gjithçka të shndërrohej në kaos, ai zhurmë që më ndjek çdo herë që mundohem të mbyll sytë për të fjetur,” shpjegoi ai.
Karovic ishte ulur në sediljen 11F, pikërisht pranë dritares, kur presioni në kabinë ra menjëherë dhe trupi i tij u thith me forcë jashtë, ndërsa avioni po lundronte në një lartësi rreth 15 mijë këmbësh dhe me shpejtësi që kalonte 600 kilometra në orë. Ai humbi vetëdijen dhe mori plagë në zonën e kokës, qafës, krahut dhe gjoksit, por fatmirësisht arriti të mbijetonte.
“Jam shumë me fat. Ende kam dhimbje koke dhe qafe, por jam gjallë. Mbase ishte rripi i sigurisë që më shpëtoi, ose ndoshta fati. Unë kam besim te Zoti dhe e falënderoj për çdo ditë që kalon,” u shpreh ai.
E shoqja, Svetlana Karovic, rrëfeu se të pranishmit në kabinë reaguan në çast për ta mbajtur atë, ndërsa veçoi një udhëtar, për të cilin beson se ishte me origjinë shqiptare, si personin që pati peshën më të madhe në shpëtimin e tij, duke ndihmuar në tërheqjen e tij brenda avionit dhe duke e zënë vrimën e dritares me një bagazh dore.
“Një burrë, që mendoj se ishte shqiptar, bëri një punë të jashtëzakonshme. U angazhua me çdo mënyrë që ta kthente sërish brenda. Ne do t’i mbetemi përherë mirënjohës,” tha ajo.
Përfaqësuesi ligjor i Karovicit, Vasilis Tsiaras, ngriti pretendimin se ndihma vendimtare erdhi nga pasagjerët dhe jo nga stjuardët, duke i akuzuar këta të fundit se mbetën të paralizuar nga tronditja gjatë gjithë ngjarjes.
Nga ana e saj, Ryanair i ka mohuar këto pohime, duke theksuar se ekuipazhi respektoi të gjitha hapat e sigurisë gjatë uljes së detyruar. Sipas linjës ajrore, pasi avioni arriti një kuotë të sigurt, punonjësit i dhanë ndihmë pasagjerit të lënduar, e sistemuan atë pranë bashkëshortes dhe i ofruan kujdes mjekësor deri në momentin e aterrimit në Selanik.
Karovic, i cili mori dalje nga spitali vetëm pak ditë më parë, pranon se procesi i shërimit do të zgjasë dhe se mjekët i kanë rekomanduar të përdorë një mbajtëse për qafën për minimumi gjashtë javë. Ai nuk e fsheh faktin që kjo përvojë e ka lënë me një frikë të thellë nga fluturimet.
