Gjermania pritet të mbajë rreth gjysmën e barrës së planit të Volkswagen për shkurtimin e 50 mijë vendeve të punës.
Të lidhura
None found
Këtë e konfirmoi drejtori ekzekutiv i grupit, Oliver Blume, teksa iu drejtua punonjësve gjatë një takimi në selinë e kompanisë në Wolfsburg.
Prodhuesi më i madh i automjeteve në Evropë, nën kontrollin e të cilit janë 10 marka, ndodhet përballë një krize të rëndë. Për të reduktuar kostot dhe për të përmirësuar gjendjen e kompanisë, Volkswagen ka përgatitur një skemë të re ristrukturimi, e dyta nismë madhore e këtij lloji pas planit të vitit 2024.
Blume shpjegoi se afërsisht gjysma e përshtatjeve të nevojshme do të përqendrohet në Gjermani, ndërsa pjesa tjetër do të zbatohet në operacionet jashtë vendit. Në tërësi, masat pritet të përfshijnë rreth 170 kompani.
Sipas drejtuesve, synimi është që reduktimi i stafit të realizohet sa më shumë përmes largimeve vullnetare. Në këtë kuadër do të përdoren veçanërisht pensionet, marrëveshjet me punonjësit dhe kufizimi i punësimeve të reja.
Njoftimi, megjithatë, ka ngjallur reagim të fortë mes punëtorëve. Gjatë fjalës së Blume para rreth 10 mijë punonjësve u dëgjuan vazhdimisht fishkëllima dhe shprehje pakënaqësie, të cilat e ndërprenë disa herë atë.
Pasiguria përfshin gjithashtu disa prej fabrikave në Gjermani. Blume pranoi se uzinat në Emden, Hanover, Zwickau dhe Neckarsulm nuk kanë ende një perspektivë të qëndrueshme prodhimi për vitet 2030.
Drejtori ekzekutiv i Volkswagen e cilësoi mbylljen e fabrikave si “zgjidhjen e fundit dhe më të shtrenjtë”. Kompania synon që, brenda gjashtë deri në 12 muajve të ardhshëm, të përcaktojë alternativa të qëndrueshme për këto impiante.
Vendimet për masat specifike do të merren pas konsultimeve me përfaqësuesit e punonjësve.
Mbledhja në Wolfsburg hapi një seri prej nëntë takimesh që do të zhvillohen gjatë ditëve të ardhshme në fabrikat kryesore të Volkswagen në Gjermani. Përmes tyre, kompania kërkon t’u shpjegojë punëtorëve planin e ristrukturimit dhe të zbusë tensionet e krijuara.
