Ish-kapiteni Chesley “Sully” Sullenberger III, heroi i aviacionit që mahniti botën me uljen e paharrueshme të një aeroplani mbi lumin Hudson në Nju Jork më 2009, ka ndarë një lajm personal: ai është diagnostikuar me sëmundjen e Alzheimerit.
Nëpërmjet një postimi në faqen e tij zyrtare, piloti 75-vjeçar tregoi se diagnoza ka ardhur së fundmi dhe se gjendja është ende në stadet fillestare.
Të lidhura
None found
“Tani për tani, kjo nënkupton se mund të më ikë ndonjë emër, të harroj një rrëfim që sapo e kam bërë ose të kem gjumë të çrregullt, por jam në nisje të këtij udhëtimi të gjatë”, shprehet ai në deklaratën e tij. Sullenberger theksoi se përjetimi i kësaj situate e ka bërë të mendojë më thellë për domethënien e shërbimit dhe ka vendosur të jetë i hapur për sëmundjen.
Emri i tij hyri në analet e historisë më 15 janar 2009, kur në rolin e kapitenit të fluturimit 1549 të US Airways nga Nju Jorku për në Karolinën e Veriut, u përball me një emergjencë të frikshme: pas përplasjes me një tufë zogjsh, të dy motorët humbën fuqinë dhe ai kreu një ulje të jashtëzakonshme në ujërat e Hudson-it. Vendimi i tij i shpejtë bëri që të 155 personat në bord të dilnin pa lëndime.
Kjo ngjarje u cilësua si një prej shpëtimeve më spektakolare në historinë e aviacionit civil dhe u shndërrua në një film të vitit 2016 të titulluar “Sully”, me protagonist të madh Tom Hanks që solli në ekran figurën e kapitenit.
Në mesazhin e tij të fundit, Sullenberger solli ndër mend një shprehje që e ka përdorur shpesh për atë fluturim: “Guximi mund të jetë ngjitës”. Tani, ai pranon se i duhet po e njëjta forcë shpirtërore për të përballuar sfidën e Alzheimerit.
“Jam bërë pjesë e një bashkësie shumë më të gjerë dhe kam besim se do t’ia dalim të gjithë së bashku kësaj prove”, përmbylli ai.
