Gjendja e sigurisë në Kramatorsk dhe Slaviansk, dy qytetet më të mëdha të Donbasit që vazhdojnë të jenë plotësisht nën kontrollin ukrainas, është rënduar ndjeshëm. Policia ukrainase u ka kërkuar banorëve civilë të largohen pa vonesë, ndërsa në zonat më të rrezikuara ka nisur evakuimi i detyruar i familjeve me fëmijë.
Të lidhura
None found
Pavlo Dyachenko, zëdhënës i policisë së rajonit të Donetskut, deklaroi se largimi i civilëve është e vetmja mundësi për të shpëtuar jetë. Ai tha se Slaviansku, i cili më herët goditej nga bomba me rrëshqitje afërsisht një herë në javë, tashmë sulmohet pothuajse çdo ditë.
Kramatorsku, Slaviansku dhe Kostiantynivka njihen si “brezi i fortifikatave” të Ukrainës. Raportet bëjnë të ditur se trupat ukrainase në Kostiantynivka janë të pranishme në numër të kufizuar, ndërsa Rusia pretendon se e ka marrë kontrollin e qytetit.
Moskën e intereson veçanërisht pushtimi i Kramatorskut dhe Slavianskut, pasi kjo do t’i mundësonte forcave ruse të vijonin përparimin drejt perëndimit. Rusia ka nën kontroll pothuajse të gjithë Luhanskun dhe rreth 80% të rajonit të Donetskut.
Sulmet ajrore ndaj këtyre qyteteve janë shtuar. Në rrugët kryesore të Kramatorskut janë vendosur rrjeta mbrojtëse kundër dronëve, ndërsa vullnetarët raportojnë se dronët FPV qëndrojnë në pritje përgjatë akseve rrugore. Për këtë arsye, udhëtimi me automjete është bërë jashtëzakonisht i rrezikshëm.
Statistikat e policisë dëshmojnë për një rritje të konsiderueshme të viktimave civile gjatë muajve të fundit.
Qershor: 16 persona të vdekur dhe 70 të plagosur, pas 40 bombave me rrëshqitje.
Korrik: 20 persona të vdekur, ndërsa u përdorën 109 bomba me rrëshqitje.
Qershor – Gusht: Në gusht, numri i të plagosurve arriti në 212, ndërsa u lëshuan 92 bomba me rrëshqitje.
Bombat me rrëshqitje, të cilat kanë peshë nga 250 kg deri në 1,500 kg, po dëmtojnë rëndë banesat dhe infrastrukturën. Sulmet e fundit në Kramatorsk, të enjten më 10 shtator 2026, plagosën të paktën shtatë persona.
Kramatorsku është aktualisht qendra administrative e rajonit të Donetskut, pasi qyteti i Donetskut ra në duart e separatistëve pro-rusë në vitin 2014.
Presidenti ukrainas Volodymyr Zelensky ka thënë se Vladimir Putin u ka vendosur gjeneralëve të tij afat deri në fund të vitit për ta përfunduar pushtimin e Donbasit. Për mbrojtjen e territorit që ka mbetur, Zelensky ka formuar dy grupe të reja operative, të drejtuara nga gjeneralët e njohur Andriy Biletsky dhe Denys Prokopenko.
Ushtarakët ukrainas vlerësojnë se në këtë zonë po zhvillohet një nga betejat më të rëndësishme të këtij viti dhe të vitit të ardhshëm.
