Anthony Fauci nuk pranoi t’u jepte përgjigje senatorëve amerikanë për prejardhjen e COVID-19 dhe për mënyrën se si Shtetet e Bashkuara e administruan pandeminë.
Të lidhura
None found
Në seancën treorëshe të Komisionit të Senatit për Sigurinë Kombëtare, 85-vjeçari iu referua më shumë se 100 herë Amendamentit të Pestë të Kushtetutës së SHBA-së. Ky amendament e mbron një person nga detyrimi për të dhënë dëshmi që mund të përdoren kundër tij.
Seanca u udhëhoq nga senatori republikan Rand Paul, i njohur si një prej kritikëve më të fortë të Faucit. Ai pretendon se ish-drejtori i Institutit Kombëtar të Alergjive dhe Sëmundjeve Infektive e ka mashtruar Kongresin për financimin e studimeve mbi koronaviruset në Institutin e Virologjisë në Wuhan, akuza që Fauci i ka hedhur poshtë vazhdimisht.
Rand Paul ka bërë publike edhe 1.141 faqe të ditarit që Fauci mbajti gjatë viteve të pandemisë. Sipas senatorit republikan, përmbajtja e këtyre shënimeve private nuk përputhet me qëndrimet që ish-zyrtari ka shprehur publikisht.
Senatori publikoi gjithashtu komunikime ndërmjet shkencëtarëve. Republikanët thonë se këto shkëmbime tregojnë se autorët diskutonin në privat mundësinë që virusi të kishte rrjedhur nga një laborator, ndonëse publikisht nuk e përkrahnin këtë hipotezë.
Fauci i ka përshkruar pretendimet ndaj tij si shpifëse, duke thënë se Rand Paul po udhëheq një fushatë politike që synon ta dërgojë atë në burg. Edhe demokratët e kanë karakterizuar seancën si një proces politik, rezultati i të cilit ishte përcaktuar paraprakisht.
Në të njëjtën kohë, mbi 150 shkencëtarë kanë bërë thirrje që të marrë fund ajo që ata e konsiderojnë përndjekje të Faucit. Sipas tyre, nuk është paraqitur asnjë provë e besueshme që ta lidhë atë me krijimin e virusit ose me fshehjen e origjinës së tij.
Çështja se nga e kishte fillesën COVID-19 vazhdon të mbetet pa një përgjigje përfundimtare. FBI-ja dhe CIA e shohin si të mundshëm skenarin e një rrjedhjeje laboratorike, por CIA i ka dhënë kësaj hipoteze një nivel të ulët besueshmërie. Ndërkaq, katër agjenci të tjera amerikane të inteligjencës, së bashku me Këshillin Kombëtar të Inteligjencës, mbështesin shpjegimin se virusi u transmetua në mënyrë natyrore nga kafshët te njerëzit.
