Të paktën nëntë persona kanë humbur jetën si pasojë e shirave të furishëm që kanë goditur ditët e fundit zonat pranë Tokios, kryeqytetit të Japonisë. Reshjet e pazakonta kanë futur nën ujë më shumë se 1,000 shtëpi, duke sjellë njëkohësisht vështirësi të mëdha në transport dhe komunikim.
Të lidhura
None found
Ngjarjet me viktima janë shënuar në prefekturën Chiba, në lindje të Tokios, sipas autoriteteve. Disa persona u gjetën të bllokuar brenda automjeteve të përmbytura, kurse për të tjerë dyshohet se janë mbytur në rrugë.
Në një nga stacionet meteorologjike të zonës u matën mbi 30 centimetra reshje gjatë 24 orëve. Agjencia Meteorologjike e Japonisë bëri të ditur se gushti është kthyer tashmë në muajin më të lagësht të regjistruar në këtë prefekturë në 60 vitet e fundit.
Gjatë një konference të jashtëzakonshme për mediat, të mbajtur të enjten në mbrëmje, një zyrtar meteorologjik paralajmëroi se vendi po përballet me një nivel të paprecedentë reshjesh të dendura.
Për herë të parë në prefekturën Chiba, meteorologët aktivizuan shkallën më të lartë të alarmit për shira të dendur. Autoritetet paralajmëruan gjithashtu për rrezikun e rrëshqitjeve të dheut, ndërsa moti i keq shkaktoi ndërprerje të furnizimit me energji elektrike.
Deri në mëngjesin e së premtes, reshjet e grumbulluara në qytetin Chiba kishin kaluar me më shumë se tri herë mesataren e shiut për të gjithë muajin gusht.
Në të gjithë territorin e prekur nga kushtet e rënda atmosferike, mbi 70 banesa kanë pësuar dëmtime të pjesshme, ndërsa më shumë se 1,000 të tjera janë përmbytur.
Sipas raportimeve të mediave japoneze, përmbytjet detyruan braktisjen e rreth 1,200 automjeteve në rrugë. Autoritetet kanë filluar operacionet për largimin dhe rikuperimin e tyre.
Shkencëtarët theksojnë se ndryshimet klimatike të nxitura nga veprimtaria njerëzore po bëjnë që reshjet ekstreme dhe dukuri të ngjashme meteorologjike të ndodhin më shpesh, të zgjasin më shumë dhe të jenë më intensive.
