Jared Kushner, i dërguari dhe dhëndri i presidentit Donald Trump, ka përfunduar një takim me Khalil al-Hayya, udhëheqësin e Hamasit, raportoi CNN.
Të lidhura
None found
Takimi u zhvillua në El Alamein të Egjiptit dhe në të mori pjesë edhe Nickolay Mladenov, drejtor i Bordit të Paqes. Bisedimet vijnë në një kohë kur ndërmjetësit po përpiqen të rikthejnë në tryezë nismën e paqes për Gazën të Presidentit Donald Trump, e cila u kundërshtua nga Izraeli javën e kaluar.
Ende nuk janë bërë të ditura hollësi për përfundimet e takimit. Përveç bisedës me përfaqësuesin e Hamasit, Kushner është takuar edhe me presidentin egjiptian Abdel Fattah el-Sisi. Ai pritet të konsultohet gjithashtu me liderë të tjerë të rajonit, mes tyre kryeministrin izraelit Benjamin Netanyahu, ndërsa vazhdojnë përpjekjet për të zgjidhur mosmarrëveshjet rreth armëpushimit të propozuar dhe të ardhmes së Gazës pas luftës.
Kontakti i drejtpërdrejtë mes një të dërguari të lartë amerikan dhe udhëheqjes së Hamasit konsiderohet i rrallë. Ky zhvillim pason përpjekjet e shtuara diplomatike për të shpëtuar planin e mbështetur nga Shtetet e Bashkuara, pasi Netanyahu hodhi poshtë disa prej elementeve kryesore të propozimit.
Të dielën, ministrat e jashtëm të Jordanisë, Emirateve të Bashkuara Arabe, Indonezisë, Pakistanit, Turqisë, Arabisë Saudite, Katarit dhe Egjiptit publikuan një deklaratë të përbashkët. Në të, ata dënuan refuzimin e Izraelit ndaj udhërrëfyesit që lidhet me planin e paqes të Trumpit dhe paralajmëruan se kundërshtimi i kësaj kornize mund të dëmtojë përpjekjet për përfundimin e luftës dhe për arritjen e një zgjidhjeje politike të qëndrueshme.
