Inspektorët bërthamorë do të vizitojnë Iranin në kuadër të një dakordësie paraprake mes Teheranit dhe Uashingtonit, ka bërë të ditur drejtori i Agjencisë Ndërkombëtare të Energjisë Atomike (IAEA), Rafael Grossi, i cili nënvizoi se aktualisht po përpunohen aspektet teknike të këtij procesi.
Gjatë një deklarate për gazetarët në Japoni, Grossi tha: “Inspektimet me të vërtetë do të zhvillohen”, duke sqaruar se agjencia është duke përcaktuar “datat, procedurat dhe vendet” ku do të kryhen kontrollet.
Të lidhura
None found
Ai bëri të ditur gjithashtu se marrëveshja e firmosur javën e kaluar parashikon që hollimi i uraniumit të pasuruar të Iranit të realizohet nën mbikëqyrjen e IAEA-s.
Megjithatë, pala iraniane ka kundërshtuar mënyrën si po interpretohet kjo marrëveshje, duke theksuar se qasja në objektet bërthamore të dëmtuara dhe në materialet e ndjeshme do të përcaktohet vetëm në një marrëveshje përfundimtare me SHBA-në.
Këto deklarata vijnë mes tensioneve diplomatike lidhur me çështjen e inspektimeve. Nga njëra anë, zyrtarë amerikanë kanë pohuar se Irani ka pranuar kthimin e inspektorëve të IAEA-s, ndërsa nga ana tjetër Teherani ka mohuar se ekziston një marrëveshje e detajuar për aksesin në objektet bërthamore.
Më herët, presidenti amerikan Donald Trump ka deklaruar se Irani ka rënë dakord për inspektimet, por autoritetet iraniane e kanë hedhur poshtë këtë pretendim, duke thënë se një dakordësi e tillë e plotë nuk ekziston.
Grossi theksoi se, pavarësisht mospërputhjeve politike, inspektimet do të realizohen në bashkëpunim me qeverinë iraniane. Sipas tij, përcaktimi i kohës së saktë të vizitave mbetet një çështje teknike dhe jo thelbësore.
Ndërkohë, marrëveshja mes SHBA-së dhe Iranit bën pjesë në një proces më të gjerë negociatash, i cili përfshin edhe çështje që lidhen me sigurinë rajonale dhe lëvizjen detare në Ngushticën e Hormuzit.
