Kongresi i Bolivisë i ka dhënë dritën jeshile marrëveshjes së huas prej 1.9 miliardë dollarësh me Fondin Monetar Ndërkombëtar, duke mbështetur përpjekjet e qeverisë së presidentit Rodrigo Paz për të përballuar krizën e rëndë ekonomike në vend.
Të lidhura
None found
Senati e ratifikoi marrëveshjen një ditë pasi ajo kishte kaluar në dhomën e ulët, duke hequr pengesën e fundit ligjore për programin trevjeçar të financimit. Plani synon të rikthejë rezervat valutore në rënie dhe të stabilizojë ekonominë boliviane, e goditur nga inflacioni i lartë dhe rritja e dobët.
Marrëveshja në nivel stafi ishte njoftuar nga FMN-ja në korrik, pas negociatave disamujore me administratën e Paz. Megjithatë, disbursimi i fondeve mund të nisë vetëm pasi programi të marrë miratimin e bordit ekzekutiv të FMN-së.
Ministri i Ekonomisë, Christian Morales, deklaroi para senatorëve se kjo marrëveshje pritet të forcojë besimin e institucioneve të tjera financiare ndaj qeverisë. Sipas tij, Banka Botërore, Banka Ndëramerikane e Zhvillimit dhe institucione të tjera mund ta ndihmojnë Bolivinë të sigurojë rreth 5 miliardë dollarë financim shtesë.
Pak orë pas votimit në Kongres, presidenti Paz shpalli heqjen e menjëhershme të subvencioneve për naftën e përdorur nga autobusët, kamionët dhe traktorët. Masa bën pjesë në kërkesat e marrëveshjes me FMN-në, ndërsa benzina, e cila konsumohet kryesisht nga automjetet private, do të mbetet e subvencionuar për momentin.
Kushtet e vendosura nga FMN-ja, sidomos ndërprerja e subvencioneve për karburantin, mund të sjellin një valë të re protestash. Gjatë qershorit dhe korrikut, Bolivia u përball për javë me protesta dhe bllokime rrugësh, të cilat paralizuan zona të mëdha të vendit.
Ndërkohë, Kongresi ka vendosur të zgjasë me 90 ditë gjendjen e jashtëzakonshme të shpallur nga Paz gjatë protestave. Kjo masë autorizon ndërhyrjen e ushtrisë për zhbllokimin e rrugëve dhe mundëson pezullimin e disa lirive civile.
