Irani kishte përgatitur një kundërpërgjigje ndaj Ukrainës, duke planifikuar sulme mbi tre baza, pas goditjes së një anijeje tregtare iraniane në Detin Kaspik. Plani u ndërpre pasi autoritetet ukrainase e përshkruan ngjarjen si një gabim, bëri të ditur Mohsen Rezaei, këshilltar i lartë ushtarak i liderit suprem të Iranit.
Të lidhura
None found
“Ne ishim të gatshëm të sulmonim tre zona në Ukrainë. Por, pasi ata thanë se bëhej fjalë për një gabim, e pezulluam përgjigjen për të vlerësuar pretendimin e tyre”, deklaroi Rezaei në një intervistë për televizionin shtetëror iranian.
Incidenti ndodhi javën e kaluar, kur Teherani akuzoi Kievin për sulmin ndaj një anijeje iraniane që transportonte ngarkesë hekuri në Detin Kaspik. Si pasojë, një marinar humbi jetën dhe tre të tjerë u plagosën. Ukraina, ndërkohë, tha se objektivi i sulmeve me dronë ishin dy anije ruse që transportonin ngarkesa ushtarake.
Situata mes Iranit dhe Ukrainës u qetësua pas një komunikimi telefonik mes ministrave të Jashtëm të të dyja vendeve. Ministri i Jashtëm iranian, Abbas Araghchi, deklaroi se homologu ukrainas e kishte siguruar se goditja e anijes iraniane nuk ishte e qëllimshme.
Pavarësisht kësaj, Rezaei nënvizoi se Irani do të kërkojë dëmshpërblim për pasojat e sulmit, edhe në rast se ai rezulton të ketë qenë aksidental.
Gjatë së njëjtës intervistë, ai tha se Teherani po përqendrohet vetëm te negociatat me Omanin lidhur me çështjen e Ngushticës së Hormuzit dhe jo te bisedimet me Shtetet e Bashkuara. Këshilltari iranian paralajmëroi se vazhdimi i bllokadës do t’i sillte pasoja forcave amerikane, ndërsa i bëri thirrje Uashingtonit të ndryshojë qasjen dhe të përmbushë angazhimet e veta.
